Qəzzada çadır şəhərcikləri selin altında qaldı
Qəzza zolağında hökm sürən ağır hava şəraiti humanitar vəziyyəti daha da çətinləşdirib. Məlumata görə güclü yağış və küləklər nəticəsində on minlərlə məcburi köçkünün yaşadığı çadırlar tamamilə su altında qalıb. O bildirib ki, bu çadırların heç biri fırtına, külək və leysan yağışlarına qarşı nəzərdə tutulmayıb və vəziyyət hər an böyük fəlakətə çevrilə bilər.
Məcburi köçkünlərin məskunlaşdığı ərazilərdə suyun səviyyəsinin artması səbəbindən onlarla ailə çadırlarını tərk etmək məcburiyyətində qalıb. Müxbir qeyd edir ki, vəziyyət minlərlə insanın həyatına birbaşa təhlükə yaradır, xüsusilə də uşaqlar, yaşlılar və xəstələr üçün risk daha yüksəkdir.
Lakin sel təkcə çadırları deyil, səhiyyə sistemini də vurub. Xüsusən Xan Yunis şəhərində yerləşən xəstəxanalarda əməliyyat otaqları və əsas keçidlər su altında qalıb. Bu isə artıq tükənmiş səhiyyə sisteminə əlavə yük gətirərək tibbi xidmətlərin göstərilməsini daha da çətinləşdirir.
Müharibə qalıqları partlayır, qurbanların sayı artır
Bölgədən gələn məlumatlara görə, son iki gündə müharibə qalıqlarının partlaması nəticəsində yaralananların sayı rekord həddə çatıb. Xüsusilə uşaqlar arasında xəsarət alanların çox olduğu bildirilir. Partlayış təhlükəsi məcburi köçkünlərin yaşadığı ərazilərdə hərəkəti daha da məhdudlaşdırır.
HƏMAS: “Qəzzanı tək buraxmayın”
HƏMAS sözçüsü Hazim Qasim açıqlamasında bildirib ki, “Qəzza sakinləri yağış səbəbindən çadırlarında bir daha boğulurlar”. O qeyd edib ki, beynəlxalq ictimaiyyətin indiyədək göstərdiyi səylər ağır humanitar böhranı yüngülləşdirməyə kifayət etməyib.
Qasim vurğulayıb ki, İsrailin davam edən blokadası və ərəb-İslam dünyasının Qəzzaya yardım çatdırmaqda acizliyi vəziyyəti daha da çıxılmaz edir. O, bütün ərəb və müsəlman ölkələrinə, eləcə də beynəlxalq ictimaiyyətə təcili yardım çağırışı edərək bildirib: “Qəzzanın sizdə haqqı var. Onu bu misilsiz humanitar faciə ilə tək qoymayın.”
Faciəvi statistika: ölən və yaralananların sayı artır
Qəzza Səhiyyə Nazirliyinin açıqlamasına görə, son 24 saatda xəstəxanalara 17 şəhidin cəsədi daxil olub: onların 3-ü yeni hücum qurbanı, 14-ü isə dağıntılar altından çıxarılan şəxslərdir. Bundan əlavə, 16 nəfər müxtəlif dərəcəli xəsarətlər alıb.
Nazirlik bildirir ki, çoxsaylı qurbanların meyitləri hələ də dağıntılar altında və küçələrdədir. Xilasedici qruplar ağır dağıntılar və avadanlıq çatışmazlığı səbəbindən onlara çata bilmir.
Rəsmi hesabata əsasən, 11 oktyabr 2025-ci ildə elan olunan atəşkəsdən bəri 345 nəfər şəhid olub, 889 nəfər yaralanıb. Ümumilikdə isə 7 oktyabr 2023-cü ildən bəri Qəzza zolağında şəhidlərin sayı 69 775-ə, yaralıların sayı isə 170 965-ə yüksəlib.
Humanitar təşkilatlar vəziyyətin daha da pisləşəcəyi barədə xəbərdarlıq edirlər. Sektor həm təbii fəlakət, həm də müharibə fəsadları arasında tamamilə köməksiz vəziyyətdədir.
