Tehran İsrailin Cənubi Livana hücumlarına sərt reaksiya verdi
İran Xarici İşlər Nazirliyinin sözçüsü İsmayıl Bəqai İsrailin Cənubi Livana qarşı həyata keçirdiyi son hücumları qəti sözlərlə pisləyib. O, bu hücumları “beynəlxalq hüququn və humanitar prinsiplərin açıq şəkildə pozulması” kimi qiymətləndirərək bildirib ki, İsrail ordusunun bu əməliyyatları bölgədə gərginliyi daha da artırır və mülki əhalini hədəfə alır.
Bəqai vurğulayıb ki, ABŞ-ın siyasi və hərbi dəstəyi olmasa, İsrail regionda bu miqyaslı hücumları davam etdirə bilməzdi. “Vaşinqton işğalçı rejimin cinayətlərinə açıq şəkildə ortaqdır”, — deyə o qeyd edib.
Zəmanətçilərin susqunluğu İsrailə cəsarət verir
İran rəsmisi atəşkəsə zəmanət verən ölkələrin susmasına da diqqət çəkib. Onun sözlərinə görə, bu passiv mövqe İsrailin pozuntularını daha da artırmasına şərait yaradır və işğalçı rejim məsuliyyətdən yayınmağa davam edir.
Tehran beynəlxalq ictimaiyyəti, xüsusilə BMT-ni İsrailin bölgədə törətdiyi hücumlara qarşı “qəti və real tədbirlər” görməyə çağırıb. Bəqai bildirib ki, işğalçı rejim beynəlxalq hüququ davamlı şəkildə pozur və buna görə cavab verməlidir.
Cənubi Livanda yeni qurbanlar
Bu gün İsrail ordusu Teyr-Fəlsiye, Einata, Şuhur və Deir-Kifa kəndlərini hədəfə alıb. Teyrinin, Bent Cəbbil bölgəsinə edilən hücum nəticəsində bir nəfər şəhid olub, 11 nəfər yaralanıb.
Ötən gecə isə İsrailin Sidanın Ayn əl-Hilvə Fələstin qaçqın düşərgəsinə endirdiyi hava zərbəsi 14 nəfərin həyatına son qoyub. Yerli mənbələr hücumların ardıcıllığının bölgədə humanitar vəziyyəti daha da kritikləşdirdiyini bildirir.
“ABŞ-la heç bir danışıqlar aparılmır”
Bəqai ABŞ-la hazırda heç bir danışıqların aparılmadığını da açıqlayıb. O deyib ki, Vaşinqtonun “öhdəlikləri pozmaq üzrə zəngin tarixi” İranın bu ölkə ilə etibarlı dialoq qurmasına mane olur.
Nazirlik rəsmisi əlavə edib ki, İranın xarici işlər naziri Abbas Əraqçi dəfələrlə bildirib: “İrana qarşı düşmən münasibət sərgiləyən, vətəndaşlarımızın qətlini legitim sayan bir tərəflə rasional dialoq aparmaq mümkün deyil.”
Riyadla mesajlaşma yalnız ikitərəfli xarakter daşıyır
Sözçü İran Prezidenti tərəfindən Səudiyyə Ərəbistanının Vəliəhdi Məhəmməd bin Səlmana göndərilən məktubun ABŞ səfəri ilə əlaqələndirilməsi barədə iddiaları da təkzib edib. O, məktubun sadəcə ikitərəfli münasibətlərə, xüsusilə Həcc mövsümündə göstərilən dəstəyə təşəkkür və gələcək əməkdaşlığın davam etdirilməsinə aid olduğunu deyib.
