Donanma 12 hücuma məruz qaldı
Sumud Donanması İsrailin son 24 saat ərzində donanmaya qarşı 12 pilotsuz uçuş aparatı (PUA) hücumu həyata keçirdiyini açıqlayıb. Hücum nəticəsində 9 qayıq birbaşa hədəfə alınıb, ümumilikdə isə 13 partlayış və ciddi rabitə pozuntuları qeydə alınıb.
Məlumata görə, İsrail PUA-ları donanmanın “Alma” adlı gəmisinin üzərində uzun müddət uçuş edərək nəzarət aparıb, daha sonra 10 qayığa bomba ataraq onlara zərər yetirib.
Donanma rəhbərliyi bəyan edib ki, bu hücumlar İsrailin “gələcək hərbi əməliyyatı əsaslandırmaq üçün aparılan dezinformasiya kampaniyasının bir hissəsidir.” Onların fikrincə, humanitar missiyalara hücum “müharibə cinayəti və beynəlxalq hüququn açıq şəkildə pozulması”dır.
BMT-yə çağırış
Qəzzaya Qarşı Blokadanı Qırma Komitəsi BMT üzv dövlətlərinə müraciət edərək donanmanın qorunmasını, hətta zərurət olduqda dövlətlərin hərbi eskortu ilə müşayiət olunmasını tələb edib. Komitə həmçinin bu hücumların BMT Baş Assambleyasının gündəliyinə salınması və xüsusi qətnamə ilə araşdırılması zərurətini vurğulayıb.
BMT nümayəndəsinin reaksiyası
BMT-nin Qəzzə üzrə xüsusi məruzəçisi Françeska Albanese də eskalasiyanın artdığını təsdiqləyib. O, sosial şəbəkə “X”də yazıb:
“Sumud Donanması çox qısa müddət ərzində 7 dəfə hücuma məruz qalıb. Qayıqlar səs bombaları, işıqlandırıcı partlayıcılar və şübhəli kimyəvi maddələrlə vurulub. Rabitə kəsilib, yardım çağırışları bloklanıb. Bu, beynəlxalq ictimaiyyətin dərhal müdaxiləsini tələb edir.”
Beynəlxalq hüququn pozulması
Ekspertlər hesab edirlər ki, İsrailin açıq dənizdə humanitar xarakter daşıyan donanmaya qarşı bu hücumu, beynəlxalq humanitar hüquqa və BMT-nin dəniz təhlükəsizliyi qaydalarına ziddir. Hadisə həmçinin Qəzzaya yardım gətirən təşkilatların fəaliyyətini ciddi təhlükə altına salıb.
