OpenAI-dən LinkedIn-ə rəqib addım
ChatGPT-nin istehsalçısı OpenAI, süni intellekt dəstəkli yeni bir iş axtarış platforması üzərində çalışdığını təsdiqləyib. “OpenAI Jobs Platform” adlanacaq xidmətin 2026-cı ilin ortalarında istifadəyə veriləcəyi planlaşdırılır.
Bu addım, OpenAI-nin ən böyük investorlarından biri olan Microsoft-un sahibi olduğu LinkedIn-ə birbaşa rəqib kimi qiymətləndirilir.
Süni intellektlə yeni iş imkanları
LinkedIn son illərdə iş axtarışını asanlaşdırmaq üçün süni intellekt texnologiyalarını platformasına inteqrasiya etmişdi. OpenAI isə yeni platformasında daha inkişaf etmiş maşın öyrənməsi alqoritmlərindən istifadə edərək iş axtaranlarla işəgötürənlər arasında “yüksək səviyyəli əlaqələr” qurmağı hədəfləyir.
OpenAI Applications şirkətinin baş direktoru Fidji Simo, platformanın yalnız texnoloji bir yenilik deyil, həm də əmək bazarında yeni fürsətlər yaradacaq mühüm bir vasitə olacağını bildirib. Onun sözlərinə görə, süni intellekt insanların işsiz qalmasına səbəb olmayacaq, əksinə “daha çox fürsətin qapısını açacaq.”
İşəgötürənlər və iş axtaranlar üçün üstünlüklər
Şirkət, işəgötürənlərə istədikləri profildə ən uyğun namizədləri seçmək imkanı verəcək alətlər təqdim etməyi planlaşdırır. İş axtaranlar isə bacarıq və təcrübələrinə uyğun vakansiyalara daha sürətli çıxış əldə edəcəklər.
Süni intellektlə hazırlanmış CV-lər dövrü
Son illərdə bir çox namizəd CV və müraciət sənədlərini önə çıxarmaq üçün ChatGPT kimi süni intellekt alətlərindən istifadə edir. Lakin mütəxəssislər bu yanaşmanın hər zaman uğur gətirmədiyini bildirirlər. Çünki bəzi platformalar müraciətləri yenidən süni intellekt vasitəsilə süzür, bəzi işəgötürənlər isə insan əli ilə hazırlanmış sənədlərə üstünlük verir.
Rəqabət daha da güclənəcək
Mütəxəssislərin fikrincə, OpenAI-nin bu addımı süni intellekt dəstəkli işə qəbul texnologiyalarının inkişafını sürətləndirəcək. 2026-cı ildən etibarən iş axtarışında və kadr seçimi proseslərində süni intellekt əsas rol oynayacaq.
