HƏMAS İsrailin sui-qəsd cəhdinə reaksiya verdi
Fələstin İslam Müqavimət Hərəkatı – HƏMAS bəyanat yayaraq İsrailin Qətərin paytaxtı Dohada təşkilatın nümayəndə heyətinə qarşı həyata keçirmək istədiyi sui-qəsd cəhdini kəskin şəkildə pisləyib. Bəyanatda qeyd olunub ki, bu addım “açıq-aşkar cinayət”, “qanunsuz təcavüz” və “beynəlxalq hüququn kobud şəkildə pozulması”dır.
Qətərin suverenliyinə zərbə
HƏMAS vurğulayıb ki, hadisə Qətərin suverenliyinə açıq müdaxilədir. Sözügedən ölkə Misirlə birlikdə atəşkəs və əsir mübadiləsi istiqamətində vasitəçilik missiyası daşıyır. Təşkilat bildirib ki, bu təcavüz İsrailin “barışıq imkanlarını sıradan çıxarmaq niyyətini” bir daha ortaya qoyur.
Şəhidlərin adları açıqlanıb
Bəyanatda hadisə nəticəsində şəhid olan şəxslərin adları da açıqlanıb. Onların sırasında HƏMAS Siyasi Büronun rəhbərlərindən Xəlil əl-Hayyanın ofis müdiri Cihad Ləbbəd, onun oğlu Hammam əl-Hayyan, həmçinin mühafizəçilər – Abdullah Abdulvahid, Mömin Həsunə və Əhməd Məmlük var. Bundan başqa, Qətərin daxili təhlükəsizlik qüvvələrinin əməkdaşı Bədr Səid Məhəmməd əl-Hümeydi də həyatını itirib.
ABŞ-a ittiham
HƏMAS bəyan edib ki, sui-qəsd cəhdi ABŞ prezidenti Donald Trampın son təkliflərinin müzakirə edildiyi vaxt baş verib. Bu da, təşkilatın fikrincə, İsrailin heç bir razılaşma istəmədiyini açıq şəkildə göstərir. Bəyanatda həmçinin ABŞ hökuməti də tənqid olunub: “Amerikanı, işğalçının cinayətlərini müdafiə etməklə bu hadisədə şərik hesab edirik”.
Siyasi nəticələr
HƏMAS vurğulayıb ki, uğursuzluqla nəticələnən sui-qəsd yalnız İsrailin regionda sülhə qarşı əngəl yaratmaq istəklərini üzə çıxarıb. Təşkilat, beynəlxalq ictimaiyyəti bu cinayətə biganə qalmamağa çağırıb.
