az.rasthaber.com xəbər verir ki, ABŞ-ın nüvə silahı daşıyan gəmiləri və sualtı qayıqlarının Venesuela sahillərində görünməsindən sonra gərginlik kəskinləşib. Prezident Nikolas Maduro mətbuat konfransında ölkənin silahlı qüvvələrinin dərhal tam hazırlıq vəziyyətinə gətirildiyini açıqlayıb.
Maduro çıxışında bəyan edib: “Bəziləri bu gün yenidən kolonializm və Cənubi Amerikanı idarə etmə dövrünü qaytarmaq istəyir. Lakin biz heç vaxt bu torpaqları əsarət altına almaq istəyən müstəmləkəçilərə yol verməyəcəyik. Biz azad bir nəsil yetişdirdik və Simon Bolivar kimi azad insanlar vasitəsilə onlara qarşı dayandıq.”
O, Cənubi Amerika ölkələrinin tarixən kolonializmə qarşı apardığı mübarizəyə diqqət çəkərək, Venesuela siyasətinin köklərinin azadlıq, müstəqillik və imperializmin məhv edilməsi prinsiplərinə söykəndiyini vurğulayıb. Prezident həmçinin bildirib ki, “Bolivar inqilabı” 21-ci əsrdə 31 ölkənin sərt blokadalarına baxmayaraq ayaqda qalıb.
Maduro, son bir ildə ölkədə keçirilən yeddi seçkini xatırladaraq, Venesuelanın demokratik nümunə olduğunu irəli sürüb. ABŞ-ın təhdidlərinə cavab olaraq isə “maksimum hərbi təzyiq” adlanan bu siyasətin cinayətkar və əsassız olduğunu bildirib və əlavə edib: “Biz silahlı qüvvələrimizi fövqəladə hazırlıq vəziyyətinə gətirdik. Ordumuz diplomatik səylərlə yanaşı ölkəni qorumağa hazırdır.”
Prezident ABŞ-ın İraqda “kütləvi qırğın silahları” yalanı ilə bir milyondan çox insanın ölümünə səbəb olduğunu da xatırladaraq, Venesuelanın heç bir təhdidi qəbul etməyəcəyini bəyan edib: “Mən iş adamı deyiləm, mən işçiyəm, döyüşçüyəm və bu torpağın müdafiəçisiyəm – nəticəsi nə olursa-olsun.”
