Tehranda geniş anım mərasimi keçirilib
İranın paytaxtı Tehranda çərşənbə axşamı Şəhid Rəhbər Ayətullah Seyid Əli Xameneinin şəhadətinin 40-cı günü münasibətilə rəsmi və kütləvi anım mərasimi təşkil olunub.
Mərasim İmam Xomeyni müsəllasında yerli vaxtla saat 17:00-dan 19:00-dək davam edib. Tədbirdə çoxsaylı din xadimləri, mülki və hərbi rəsmilər, eləcə də Ayətullah Seyid Əli Xameneinin tərəfdarları iştirak ediblər.
İranın rəsmi məlumatına görə, mərasim ölkənin hazırkı ali rəhbəri Ayətullah Seyid Müctəba Xameneinin dəvəti ilə təşkil olunub.
Yüksək vəzifəli rəsmilər də mərasimə qatılıb
Mərasimdə Şəhid Ayətullah Seyid Əli Xameneinin övladları ilə yanaşı, İranın siyasi və dövlət strukturlarının yüksək vəzifəli nümayəndələri də iştirak ediblər.
İştirakçılar arasında İran İslam Şurası Məclisinin sədri Məhəmməd Baqir Qalibaf, Məhəmməd Rza Arif və Həsən Xomeyninin də olduğu bildirilib.
Anım mərasimi zamanı Şəhid Ayətullah SeyidƏli Xameneinin siyasi və dini fəaliyyəti xatırlanıb, onun tərəfdarlarına müraciətlər səsləndirilib.
Anım tədbirləri Qum və Məşhəddə davam edəcək
Şəhid Ayətullah Seyid Əli Xameneinin 40-cı günü ilə əlaqədar tədbirlər yalnız Tehranla məhdudlaşmayacaq.
Açıqlanan proqrama əsasən, növbəti mərasim çərşənbə günü Qum şəhərində, Həzrət Məsumənin (s.ə) hərəmində məğrib və işa namazlarından sonra keçiriləcək.
Cümə axşamı isə eyni vaxtda Məşhəd şəhərində İmam Rza (ə) hərəmində daha bir anım mərasiminin təşkili nəzərdə tutulur.
İran əhalisinə kütləvi iştirak çağırışı
İranın ali rəhbərinin ofisi ölkə əhalisini keçiriləcək mərasimlərdə geniş iştiraka çağırıb. Açıqlamada kütləvi iştirakın Şəhid Ayətullah Seyid Əli Xameneinin siyasi xəttinə sədaqətin yenilənməsi və onun yolunun davam etdirilməsinə dəstək kimi qiymətləndirildiyi bildirilib.
Beləliklə, Tehranda başlayan anım tədbirlərinin qarşıdakı iki gün ərzində İranın mühüm dini mərkəzləri olan Qum və Məşhəddə davam etdirilməsi planlaşdırılır.
Ayətullah Seyid Əli Xameneinin şəhadəti ilə bağlı İranın açıqlaması
İran tərəfinin açıqlamasına əsasən, Şəhid Ayətullah Seyid Əli Xamenei fevralın 28-də Tehranda ABŞ və İsrail qüvvələrinin həyata keçirdiyi hava hücumu nəticəsində şəhadətə qovuşub.
