Əraqçi regional sabitliyi müzakirə edib
İranın xarici işlər naziri Abbas Əraqçi Omanın xarici işlər naziri Bədr əl-Busaidi və Səudiyyə Ərəbistanının xarici işlər naziri Feysəl bin Fərhanla ayrı-ayrılıqda telefon danışıqları aparıb.
İran Xarici İşlər Nazirliyinin məlumatına görə, tərəflər ikitərəfli münasibətlər, regional proseslər və Hörmüz boğazındakı son vəziyyət ətrafında fikir mübadiləsi aparıblar.
Əraqçi bölgədə sabitliyin bərpası və Hörmüz boğazında yaranmış gərginliyin aradan qaldırılması üçün diplomatik əməkdaşlığın gücləndirilməsinin vacibliyini vurğulayıb.
Oman Hörmüz boğazı ilə bağlı yeni təklif irəli sürüb
Məlumata görə, Oman İrana Hörmüz boğazının idarə olunması ilə bağlı regional mexanizmin yaradılmasını nəzərdə tutan təklif təqdim edib.
Bildirilir ki, təşəbbüs bölgə ölkələrinin dəstəyini qazanıb və İranın boğaza təkbaşına nəzarət etməsini nəzərdə tutmur.
Təklif Malakka boğazında tətbiq olunan model əsasında hazırlanıb. Bu modeldə boğazdan istifadə edən tərəflər könüllü şəkildə gəmiçilik xidmətlərinin, ətraf mühitin mühafizəsinin və axtarış-xilasetmə əməliyyatlarının maliyyələşdirilməsində iştirak edirlər.
Texniki məsləhətləşmələr davam edir
Bundan əvvəl İran Xarici İşlər Nazirliyinin sözçüsü İsmayıl Bəqayi İran və Oman rəsmilərinin Tehranda Hörmüz boğazı ilə bağlı məhsuldar danışıqlar apardıqlarını və texniki-siyasi məsləhətləşmələrin davam etdiyini açıqlamışdı.
Tehran dialoqa sadiq olduğunu bildirir
İran rəsmiləri ABŞ ilə gərginliyin davam etməsinə baxmayaraq, diplomatik kanalların açıq saxlanıldığını bildirirlər.
İsmayıl Bəqayi qeyd edib ki, Tehran və Vaşinqton vasitəçilər, o cümlədən Qətər və Pakistan üzərindən mesaj mübadiləsini davam etdirir.
İranın vitse-prezidenti Məhəmməd Rza Arif isə ölkəsinin dialoq və diplomatiya prinsipinə sadiq qaldığını vurğulayaraq, milli maraqların danışıqlar yolu ilə müdafiə ediləcəyini bildirib.
Xarici işlər nazirinin müavini Kazım Qəribabadi də Tehranın əvvəlki danışıqlarda ABŞ-nin irəli sürdüyü tələbləri qəbul etmədiyini və Hörmüz boğazı ilə bağlı mövqeyindən geri çəkilmədiyini bəyan edib.
