Trampın zarafatı gündəm oldu
ABŞ Prezidenti Donald Tramp Ağ Ev müxbirlərinin şam yeməyində çıxışı zamanı prezidentliyi və gələcək siyasi planları ilə bağlı zarafat edib.
Aprel ayında baş vermiş sui-qəsd cəhdinə görə təxirə salınan tədbirdə çıxış edən Tramp proqramın yenidən təşkil olunmasına toxunaraq bunu prezidentlik dövrləri ilə müqayisə edib.
“İkinci dəfə həmişə daha yaxşıdır”
Tramp tədbirin ikinci dəfə keçirilməsinə işarə edərək bildirib:
“İkinci dəfə cəhd etmək həmişə daha yaxşıdır. Mənim prezidentliyimdə olduğu kimi, ikinci dəfə həmişə daha yaxşıdır. Üçüncü dəfə isə daha da yaxşı olacaq.”
Bu sözlər zalda gülüşlə qarşılanıb.
“Sadəcə zarafat edirəm”
Səsləndirdiyi fikirlərdən dərhal sonra Tramp açıqlamasına aydınlıq gətirərək bunun zarafat olduğunu bildirib.
O, “Sadəcə zarafat edirəm” ifadəsini işlədərək çıxışını davam etdirib.
“Gələn il tədbir mənim adımla keçiriləcək”
ABŞ Prezidenti çıxışında daha bir zarafat edərək bildirib ki, Paramount Skydance şirkətinin baş icraçı direktoru Devid Ellison ona gələn il keçiriləcək Ağ Ev müxbirlərinin şam yeməyinin “Tramp Ağ Ev Müxbirlərinin Şam Yeməyi” adlandırılacağını söyləyib.
Tramp bu fikri də zarafatla səsləndirib.
“Üçüncü müddət” mövzusu yenidən gündəmə gəldi
Bu, Trampın son günlər üçüncü prezidentlik müddəti ilə bağlı etdiyi ilk zarafat deyil.
O, iki gün əvvəl Corciya ştatında keçirilən tədbirdə də “Buraya namizədliyimi elan etməyə gəlmişəm” dedikdən sonra “Sadəcə zarafat edirəm” ifadəsini işlətmişdi.
Trampın bu açıqlamaları ABŞ-də yenidən üçüncü prezidentlik müddəti ilə bağlı müzakirələri gündəmə gətirib.
