Vilayəti: Yəmənə qarşı mühasirə dərhal aradan qaldırılmalıdır
İran İslam İnqilabının Ali Rəhbərinin siyasi və beynəlxalq məsələlər üzrə müşaviri Əli Əkbər Vilayəti “Ənsarullah” hərəkatının nümayəndə heyəti ilə görüşü zamanı Yəmənə tətbiq olunan mühasirənin dərhal dayandırılmasının vacibliyini vurğulayıb.
Vilayəti bildirib ki, İranın müstəmləkəçilik və müqavimət cəbhəsini zəiflətməyə yönəlmiş siyasətlərə qarşı mövqeyi qəti, aydın və dəyişməz olaraq qalır.
“Bölgədə güc balansı dəyişib”
Əli Əkbər Vilayəti qeyd edib ki, son hərbi qarşıdurmalar bölgədə qüvvələr nisbətini dəyişdirib.
Onun sözlərinə görə, artıq Qərbi Asiyada ABŞ üçün əvvəlki mövqe qalmayıb və güc balansı müqavimət göstərən xalqların xeyrinə dəyişməkdədir.
Vilayəti həmçinin Yəmən və Livandakı “Hizbullah” hərəkatını müqavimət cəbhəsinin əsas dayaqları adlandıraraq, onların bölgənin müstəqilliyini və suverenliyini qoruyan əsas qüvvələr olduğunu bildirib.
Səudiyyə ilə gərginlik fonunda açıqlama
Vilayətinin bəyanatı Sənanın Səudiyyə Ərəbistanının İran mülki təyyarəsinin Səna Beynəlxalq Hava Limanına enişinə mane olmaq cəhdinin qarşısını aldığını açıqlamasından sonra səsləndirilib.
Yəmən Silahlı Qüvvələri daha sonra xəbərdarlıq edərək bildirib ki, ölkənin hava məkanına qarşı istənilən yeni hücum cavabsız qalmayacaq və cavab tədbirləri Səudiyyə Ərəbistanının hava limanları və həyati əhəmiyyət daşıyan infrastrukturunu hədəf ala bilər.
Yəmən uzun illərdir mühasirə altındadır
Səna Beynəlxalq Hava Limanı 2015-ci ilin martında başlayan hərbi əməliyyatlardan sonra fəaliyyətini demək olar ki, dayandırıb.
2016-cı il avqustun 9-da Səudiyyə Ərəbistanının rəhbərlik etdiyi koalisiya Yəmənin hava məkanına tətbiq etdiyi məhdudiyyətləri daha da sərtləşdirərək hava limanını kommersiya reysləri üçün tam bağlayıb.
Mühasirə nəticəsində təkcə sərnişin daşımaları deyil, həm də dərman, tibbi ləvazimat və digər humanitar yüklərin çatdırılması ciddi şəkildə məhdudlaşıb. Bu isə ölkədə humanitar vəziyyətin ağırlaşmasına, həm iqtisadi, həm də insan itkilərinin artmasına səbəb olub.
Sonrakı dövrlərdə hava limanında müəyyən istiqamətlər üzrə məhdud sayda reyslər bərpa edilsə də, obyekt yenidən bağlanıb və müxtəlif hücumlara, o cümlədən İsrail aviasiyasının zərbələrinə məruz qalaraq ciddi dağıntılar alıb.
