Zəvvar yürüşü faciəyə çevrildi
Taylandın paytaxtı Banqkokdan təxminən 600 kilometr şimal-şərqdə yerləşən Mukdahan əyalətində ağır yol-nəqliyyat hadisəsi baş verib.
Məlumata görə, Mukdahan əyalətindən qonşu Ubon Ratçatani əyalətinə doğru 260 kilometrlik zəvvar yürüşünə çıxan 35 Buddist rahibin olduğu qrupa pikap avtomobili çırpılıb.
Sükan arxasında 11 yaşlı uşaq olub
İlkin məlumata əsasən, qəzanı törədən pikapı 11 yaşlı uşaq idarə edib.
Hadisə nəticəsində 5 rahib hadisə yerində həyatını itirib. Yaralı vəziyyətdə xəstəxanaya çatdırılan daha 4 rahib isə həkimlərin səylərinə baxmayaraq vəfat edib.
Beləliklə, qəza nəticəsində ölənlərin sayı 9 nəfərə çatıb.
Yaralıların vəziyyəti ağırdır
Qəza zamanı 13 nəfər müxtəlif dərəcəli xəsarətlər alaraq ətrafdakı xəstəxanalara yerləşdirilib.
Rəsmi məlumata görə, yaralılardan üçünün vəziyyəti ağır olaraq qalır və onların müalicəsi davam etdirilir.
Hadisə ilə bağlı araşdırma aparılır
Hüquq-mühafizə orqanları qəzanın başvermə səbəblərini araşdırır.
Azyaşlının avtomobili hansı şəraitdə idarə etdiyi və hadisənin bütün təfərrüatlarının araşdırılmasından sonra əlavə məlumat veriləcəyi bildirilib.
Baş verən faciə Tayland ictimaiyyətində geniş rezonans doğurub və azyaşlıların nəqliyyat vasitələrini idarə etməsi ilə bağlı təhlükəsizlik məsələlərini yenidən gündəmə gətirib.
