İran ABŞ və İsrailə xəbərdarlıq etdi
İran İnqilab Keşikçiləri Korpusunun Hərbi Dəniz Qüvvələrinin komandanlığı bəyan edib ki, İran İslam Respublikasına məxsus neft tankerləri və ticarət gəmilərinə qarşı hər hansı hücum ciddi cavabla qarşılanacaq.
Bəyanatda vurğulanıb ki, belə bir addım bölgədə yerləşən ABŞ mərkəzləri və “düşmən gəmilərinə” qarşı şiddətli hücumlarla nəticələnəcək.
“Raketlər və pilotsuz aparatlarımız hazır vəziyyətdədir”
İnqilab Keşikçilərinin Hava-Kosmik Qüvvələrinin komandanı briqada generalı Məcid Musəvi bildirib ki, qüvvələrə məxsus raketlər və pilotsuz uçuş aparatları bölgədəki Amerika hədəfləri və İsrailə aid hərbi obyektlərə yönəldilib.
O qeyd edib ki, qüvvələr hazır vəziyyətdədir və yalnız əmrin verilməsini gözləyir.
Tehran: ABŞ eskalasiya istəmir
İran Xarici İşlər Nazirliyinin sözçüsünün müşaviri Əli Səfri isə bildirib ki, Tehran müxtəlif diplomatik kanallar vasitəsilə ABŞ-ın hərbi eskalasiyanın böyüməsini istəmədiyinə dair mesajlar alır.
Səfri əlavə edib ki, İran bölgədə yarana biləcək bütün ssenarilərə hazırdır və ölkənin müdafiə imkanları tam hazırlıq vəziyyətində saxlanılır.
ABŞ və İran arasında müvəqqəti razılaşma müzakirələri
ABŞ prezidenti Donald Trump daha əvvəl İranın müharibənin dayandırılması ilə bağlı son təklifə yaxın zamanda cavab verəcəyini bildirmişdi. O, həmçinin İranın hərbi gücünün zəiflədildiyini iddia etmişdi.
Reuters agentliyinin məlumatına görə, Vaşinqton və Tehran arasında məhdud və müvəqqəti atəşkəs razılaşması üzrə danışıqlar davam edir. Hazırlanan çərçivə sənədinin əsas məqsədi qarşıdurmanın dayandırılması və bölgədə gərginliyin nəzarətdə saxlanılmasıdır.
