Əbu Ubeydədən sərt çağırış
HƏMAS-ın hərbi qanadı olan “İzzəddin əl-Qəssam Briqadaları”nın sözçüsü Əbu Ubeydə fələstinlilərə müraciət edərək onları əsirlərin müdafiəsi üçün “xüsusi əməliyyatlar” həyata keçirməyə çağırıb.
O bildirib ki, region hazırda genişmiqyaslı hərbi hücumlarla üz-üzədir və bu vəziyyət bütün qüvvələrin səfərbər olunmasını tələb edir.
“Əl-Əqsa və əsirlər qırmızı xətdir”
Əbu Ubeydə vurğulayıb ki, Əl-Əqsa məscidinə və fələstinli əsirlərə qarşı hər hansı addım cavabsız qalmayacaq. O, fələstinliləri Qüds və İordan çayının qərb sahilində hərəkətə keçməyə çağırıb.
Eyni zamanda, dünya ictimaiyyətini və müsəlman ölkələrini bu məsələdə daha fəal mövqe tutmağa səsləyib.
“Əsir qanunu utancdır”
Əbu Ubeydə sionist rejimin əsirlərlə bağlı qəbul etdiyi qərarı “utancverici” adlandırıb. Onun sözlərinə görə, bu addım beynəlxalq səviyyədə ciddi reaksiya doğurmalıdır.
O qeyd edib ki, fələstin tərəfi vasitəçilərlə razılaşmalara sadiq qalsa da, sionist rejim bu prosesləri pozur.
Regiondakı hücumlara münasibət
Əbu Ubeydə çıxışında İran, Livan və Yəməndə baş verən hadisələrə də toxunub. O bildirib ki, bu ölkələrdə həyata keçirilən hücumlar ABŞ və sionist rejimin hərəkətlərinə cavabdır.
Onun sözlərinə görə, bu zərbələr Qəzzadan başlayan “Əl-Əqsa tufanı”nın davamıdır.
Livan və Hizbullaha dəstək
HƏMAS sözçüsü Livanda Hizbullahın fəaliyyətini yüksək qiymətləndirib və sionist rejimə qarşı mübarizədə onların rolunu vurğulayıb. O, müqavimət qüvvələrinin koordinasiyasının gücləndiyini qeyd edib.
Əbu Ubeydə həmçinin Livan müqavimətinə sionist rejim əsgərlərini əsir götürmək üçün fürsətlərdən istifadə etməyi tövsiyə edib.
“Regionu onun öz xalqı idarə edəcək”
Əbu Ubeydə çıxışının sonunda bildirib ki, regionun gələcəyi xarici güclər tərəfindən deyil, onun öz xalqları tərəfindən müəyyən ediləcək.
O vurğulayıb ki, mövcud qarşıdurmalar nəticəsində sionist rejimin planları uğursuzluğa düçar olacaq və regionda yeni güc balansı formalaşacaq.
