Cenevrə üçün təkliflər paketi
İran parlamentinin Milli Təhlükəsizlik və Xarici Siyasət Komissiyasının üzvü İbrahim Rizai bildirib ki, Tehran Cenevrədə keçiriləcək növbəti danışıqlar raundu üçün təkliflər paketi hazırlayıb.
Onun sözlərinə görə, bu paket danışıqlarda vaxt itkisini azaltmaq məqsədi daşıyır və İran tərəfi konkret çərçivə ilə masaya əyləşəcək.
Uran zənginləşdirilməsi müzakirə mövzusu deyil
Rizai vurğulayıb ki, İran bu mərhələdə uranın zənginləşdirilməsinin dayandırılmasını müzakirə etməyəcək və zənginləşdirilmiş uran ehtiyatlarının ölkə xaricinə çıxarılması gündəmdə deyil. O, Vaşinqtonun da bu mövqeni qəbul etdiyini iddia edib.
Deputat əlavə edib ki, Cenevrə danışıqlarında İranın raket proqramı və regional məsələlər müzakirə predmeti olmayacaq.
“Nikbin deyilik”
İbrahim Rizai danışıqların nəticələri ilə bağlı ciddi nikbinlik olmadığını deyib və ABŞ-ın əvvəlki razılaşmaları pozduğunu xatırladıb.
Onun fikrincə, bölgədə əsas problem İsraildir və bu məsələ ayrıca regional formatda müzakirə olunmalıdır.
ABŞ-dan açıqlamalar
İran xarici işlər nazirinin müavini Məcid Taxt Rəvançi isə bildirib ki, əgər ABŞ sanksiyaların ləğvi məsələsini müzakirəyə açarsa, Tehran müəyyən güzəştləri nəzərdən keçirməyə hazırdır.
Digər tərəfdən, Reuters agentliyi ABŞ rəsmilərinə istinadən yazıb ki, prezident Donald Trump hərbi əməliyyat əmri verərsə, ABŞ ordusu İrana qarşı həftələrlə davam edə biləcək əməliyyatlara hazırlaşır.
ABŞ dövlət katibi Marco Rubio isə bildirib ki, Tramp razılaşmaya üstünlük versə də, bunun əldə olunması olduqca çətindir.
Qeyri-birbaşa danışıqlar
Qeyd edək ki, Cenevrədə keçiriləcək görüşlər İran və ABŞ arasında qeyri-birbaşa formatda və Oman vasitəçiliyi ilə baş tutacaq.
