Yəməndə Cənub Keçid Şurası ilə sionist rejim arasında siyasi təmaslar
Sionist rejim mediası Yəməndə fəaliyyət göstərən və ölkənin cənubunun ayrılmasını hədəfləyən Cənub Keçid Şurasının (CKŞ) sionist rejim rəsmiləri ilə siyasi təmaslar qurduğunu iddia edib. Məlumata görə, bu əlaqələr regional və beynəlxalq dəstək qazanmaq məqsədi daşıyır və şura cənub Yəməndə “müstəqillik” əldə edəcəyi təqdirdə İsraili tanımağa hazır olduğunu bildirib.
Sionist rejimin İctimai Yayım Qurumu diplomatik mənbəyə istinadən xəbər verir ki, cənub Yəməndəki CKŞ nümayəndələri sionist rejimdən Ədən bölgəsində “müstəqillik” elan olunması planına dəstək verməyi xahiş ediblər. Mənbənin sözlərinə görə, belə bir dəstək tərəflər arasında “ortaq gündəliyin” güclənməsinə xidmət edə bilər.
Ədən və cənub bölgələrində nəzarət genişlənir
Məlumatlar CKŞ-nin son dövrlərdə Yəmənin cənubunda təsir dairəsini genişləndirdiyi bir vaxta təsadüf edir. Birləşmiş Ərəb Əmirlikləri tərəfindən dəstəklənən və Yəmənin bölünməsini hədəfləyən şura, ölkənin cənubunda bir sıra strateji ərazilərə, o cümlədən sahil şəhəri Ədənə nəzarəti ələ keçirib. Qeyd olunur ki, Ədən şəhəri əvvəllər Səudiyyə Ərəbistanının dəstəklədiyi hökumətin əsas qərargahı kimi fəaliyyət göstərib.
Diplomatik mənbə sionist rejimin mümkün dəstəyinin “Ədən körfəzi və Babülməndəb boğazında dəniz yollarının qorunmasına, həmçinin İran mənşəli silahların Ənsarullah hərəkatına ötürülməsinin və Sənə ilə əməkdaşlıq edən ‘Müsəlman Qardaşları’na bağlı silahlı qrupların qarşısının alınmasına” töhfə verə biləcəyini iddia edib.
Burada xüsusi vurğulanmalıdır ki, Yəmən silahlı qüvvələrinin əməliyyatları heç vaxt beynəlxalq dəniz nəqliyyatı üçün təhlükə yaratmayıb. Bu əməliyyatlar yalnız işğalçı qüvvələrə və onları dəstəkləyən gəmilərə qarşı yönəlib və Qəzza ilə həmrəylik məqsədi daşıyaraq işğalın sektora qarşı hücumlarını dayandırmağa məcbur etmək niyyəti güdüb.
“Yeni dövlət” planı və İbrahim sazişləri
Mənbə əlavə edib ki, BƏƏ-nin dəstəklədiyi CKŞ qüvvələri hərbi, təhlükəsizlik və iqtisadi sahələrdə sionist rejimin dəstəyinə ehtiyac duyur. Bu dəstəyin şuranın qurmaq istədiyi “yeni dövlət” layihəsinin inkişafına xidmət edəcəyi bildirilir. Eyni zamanda tərəflər arasında “ortaq düşmənlərin” mövcud olduğu da vurğulanır.
Böyük Britaniyanın “The Times” qəzetinin yaydığı məlumata görə isə CKŞ nümayəndələri sionist rejimin tərəfdaşlarına mesaj göndərərək, cənub Yəməndə “müstəqillik” əldə olunduğu halda sionist rejimi ölkə olaraq tanımaq niyyətində olduqlarını çatdırıblar. Bildirilir ki, bu addım onların ABŞ-ın keçmiş prezidenti Donald Trampın dövründə imzalanmış İbrahim sazişlərinə qoşulmaq istəyi ilə bağlıdır.
