Bəzi təhdidlərin kimlər tərəfindən edildiyi məlum olmasa da, silahlı qruplar və fərdi şəxslər bu gərginlikdə əsas rol oynayır.

Rasthaber Azərbaycan xəbər verir ki, Suriyada HTŞ qüvvələrinin Bəşər Əsədi devirməsindən sonra on minlərlə suriyalı Şiə və digər dini azlıqlar (xüsusilə ələvilər) Livana üz tutub. Livanlı rəsmilərin sözlərinə görə, Dəməşqin yeni rəhbərliyinin təhlükəsizlik təminatlarına baxmayaraq, bu icmalar təqib və qisas qorxusundan qaçırlar.

Suriya-Livan sərhədində, xüsusilə rəsmi keçid məntəqələrində minlərlə insan ölkəni tərk etməyə çalışır. Şiə qaçqınlar mediaya verdikləri müsahibələrdə, əsasən sosial media vasitəsilə ölüm təhdidləri aldıqlarını bildiriblər. Bəzi təhdidlərin kimlər tərəfindən edildiyi məlum olmasa da, silahlı qruplar və fərdi şəxslər bu gərginlikdə əsas rol oynayır.

“Heyət Təhrir əş-Şam”ın rəhbərliyinin azlıqların qorunmasına dair verdiyi vədlərə rəğmən, onların gücsüz vəziyyətdə qalması Şiə və digər azlıq icmalarını daha da narahat edir. Heyət Təhrir əş-Şam, Əl-Qaidədən ayrılmış qruplaşma olsa da, Suriya daxilində hakimiyyət uğrunda mübarizə aparan yeganə silahlı qüvvə deyil.

Şiə icması, xüsusilə 13 ildir davam edən və məzhəb qarşıdurmasına çevrilmiş Suriya müharibəsinin ön cəbhələrində olub. Əsədin əsas müttəfiqləri, Livandakı “Hizbullah” və İranın dəstəklədiyi digər Şiə qüvvələri, Suriya hökumətini müdafiə üçün ölkəyə cəlb edilmişdilər.

Sərhəd məntəqələrində günlərlə gözləyən qaçqınlar, təhdidlərdən sonra təcili şəkildə evlərini tərk etmək məcburiyyətində qaldıqlarını deyirlər. Məsələn, Dəməşqli bir qadın, evinin yandırıldığını və silahlı şəxslərin onları silah gücünə çıxmağa məcbur etdiyini bildirib.

Livan təhlükəsizlik mənbələri son günlərdə 100 mindən çox insanın qeyri-rəsmi keçid məntəqələrindən istifadə edərək Livana daxil olduğunu qeyd edib. Qaçqınlar arasında xüsusilə Şiələrin sıx məskunlaşdığı Səyyidə Zeynəb bölgəsindən gələnlərin sayı çoxdur. Bu bölgə, əvvəllər “Hizbullah” və digər Şiə qruplaşmalarının mövcudluğu ilə tanınırdı.