Qəzzada humanitar fəlakət günü-gündən dərinləşdiyi bir vaxtda sionist İsrailin irs naziri Amichai Eliyahunun canlı yayımda verdiyi açıqlamalar dünya ictimai rəyini oyadıb. Eliyahu Qəzzaya humanitar yardımın kəsilməsini və fələstinliləri aclığa məhkum etməyi müdafiə edib.
Az.rasthaber.com xəbər verir ki, soyqırım törədən İsrailin Kanal 7 televiziyasına danışan nazir Amichai Eliyahu Qəzzadakı ərzaq və yanacaq anbarlarını hədəf almağı təklif edərək, humanitar yardımın düşməni gücləndirdiyini iddia edib. “Onlar aclıqdan ölməlidirlər” deyən Eliyahu birbaşa mülki insanları hədəf alan bu sözləri ilə beynəlxalq hüquq normalarını heçə saydı.
BMT-nin UNRWA agentliyi Qəzzada “texnogen qıtlıq fəlakəti”nin olduğunu bəyan edib. Qəzza Səhiyyə Nazirliyi, əksəriyyəti uşaq və körpələrdən ibarət 57 nəfərin aclıqdan öldüyünü, 3500 uşağın isə ölüm riski altında olduğunu bildirib.
Qəzzada çörək bişirənlərin un və yanacaq çatışmazlığı səbəbindən işləmədiyi, əhalinin 91 faizinin ərzaq böhranı yaşadığı bildirilir. Uşaqların 92 faizi ağır qida çatışmazlığı ilə üzləşdiyi halda, 70 mindən çox uşaq bu səbəbdən xəstəxanalara yerləşdirilib.
Eliyahunun açıqlamaları bir daha İsrailin Qəzza siyasətinin humanitar ölçüsünü gündəmə gətirsə də, insan haqları təşkilatlarının və beynəlxalq ictimaiyyətin buna necə reaksiya verəcəyi maraq doğurur. Bu açıqlamadan sonra Eliyahu ilə bağlı hər hansı rəsmi təhqiqatın başlanıb-başlanmayacağı hələlik məlum deyil.
