Yəmənin Ənsarullah Hərəkatının lideri Seyid Əbdülməlik Bədrəddin Husi, Səudiyyə koalisiyasını Yəmən ordusunun yaratdığı üç günlük birtərəfli atəşkəsdən yararlanmağa çağırıb.

Az.rasthaber.com "İRNA"ya istinadən xəbər verir ki, Husi bu sözləri Ramazan ayı öncəsi, Yəmən ruhaniləri və liderləri ilə görüşündə, videokonfrans vasitəsilə etdiyi çıxışda səsləndirib.

Yəmənə hücum edən ölkələrin, Yəmənə qarşı iqtisadi blokadaya son qoymayacağı təqdirdə, hücumlardan qurtula bilməyəcəklərini vurğulayan Husi, Səudiyyə-Amerika təcavüz koalisiyasına Yəməndə hərbi əməliyyatların dayandırılması planı və üç günlük birtərəfli atəşkəs nəticəsində əldə edilən fürsəti əldən verməmək barədə xəbərdarlıq edərək, təcavüzkarların bu fürsəti əldən verdikləri təqdirdə, peşman olacaqlarını söyləyib.

Husi çıxışına bu cür davam edib:

"Biz bütün gücümüzlə təcavüzə və iqtisadi blokadaya qarşı çıxacağıq və Yəmənin iqtisadi blokadasının heç bir şəkildə davam etməsinə imkan verməyəcəyik.

Allahın izni ilə müharibənin səkkizinci ili, "Yəmən mühasirəsini darmadağın etmə" əməliyyatının üçüncü mərhələsi ilə başladı və bütün dünyaya səs saldı.

Mübarək Ramazan ayının gəlişini qeyd edərək, insanları xeyriyyə işlərinə, həmrəyliyə, ehtiyacı olanlara və yoxsullara kömək etməyə, malların qiymətində süni artım yaradanlara qarşı durmağa çağırıram”.

 Qeyd edək ki, xəbər mənbələrinin bu gün səhər verdiyi məlumata görə, Səudiyyə koalisiyasının bombardmançıları, Yəmən ordusu və xalq komitələrinin birtərəfli atəşkəs elan etməsinə baxmayaraq, son bir neçə saat ərzində Yəmənin bir neçə bölgəsini bombalayıb.

Yəmən hərbi mənbələrinin məlumatına görə, Səudiyyə koalisiya qüvvələri son 24 saat ərzində Hudeydə əyalətində iddia edilən atəşkəs rejimini 185 dəfə pozub.

Xatırladaq ki, hücumlar Yəmənin Ali Siyasi Şurasının sədri Mehdi Müşadın, daha əvvəl Səudiyyə Ərəbistanına qarşı bütün raket və pilotsuz təyyarələrin hücumlarını birtərəfli qaydada üç gün müddətinə dayandıracağını söyləməsindən sonra baş verib.