Mərakeşdə baş verən və 2946 nəfərin ölümünə səbəb olan 7 bal gücündə zəlzələdə təxminən 50 min ev tamamilə və ya qismən dağılıb.
Az.rasthaber.com xəbər verir ki, Mərakeş Kral Divanından verilən yazılı açıqlamaya görə, zəlzələ nəticəsində yurd-yuvasız qalanların sığınacaq ehtiyaclarının ödənilməsi və lazımi yardımların çatdırılması ilə əlaqədar fövqəladə hal proqramının həyata keçirilməsi üçün Kral VI Məhəmmədin sədrliyi ilə xüsusi iclas keçirilib.
Açıqlamada zəlzələdən zərər çəkmiş 5 bölgədə təxminən 50 min evin tamamilə və ya qismən dağıldığı, dövlətin zəlzələdən zərər çəkmiş ailələrə 30 min dirhəm (təxminən 3 min dollar) məbləğində təcili yardım edəcəyi qeyd edilib.
Açıqlamada tamamilə dağılan evlər üçün 140 min dirhəm (təxminən 14 min dollar), qismən dağılmış evlər üçün isə 80 min dirhəm (təxminən 8 min dollar) birbaşa maliyyə yardımı veriləcəyi bildirilib.
Sentyabrın 8-də yerli vaxtla saat 23.10-da Mərakeşdə 7 bal gücündə zəlzələ baş verib.
Zəlzələ Mərakeşlə yanaşı, Rabat, Kasablanka, Meknes, Aqadir və Fes şəhərlərində də hiss olunub.
Mərakeş Daxili İşlər Nazirliyinin son məlumatlarına görə, zəlzələ nəticəsində 2 min 946 nəfər həyatını itirib, daha 5 min 674 nəfər də yaralanıb.
