İsrail qüvvələrinin atəşi nəticəsində həyatını itirən 24 yaşlı fələstinli gəncin cənazə mərasiminə müdaxilə edilib. Onlarla fələstinli yaralanıb.

Az.rasthaber.com SalamNews-a istinadən xəbər verir ki, bu barədə Fələstinin Qızıl Aypara Cəmiyyəti bəyanat verib.

Bildirilib ki, İsrail qüvvələrinin atəşi nəticəsində həyatını itirmiş 24 yaşlı Vəlid Şərifin əl-Əqsa məscidi ətrafında keçirilən cənazə mərasiminə zorakı şəkildə müdaxilə edilib.

İsrail qüvvələrinin müdaxiləsi nəticəsində 45 fələstinli yaralanıb ki, onların 16-sı xəstəxanaya yerləşdirilib.

Qeyd edək ki, Vəlid Şərif bir neçə gün öncə aldığı güllə yarasından həyatını itirib.

Tanınmış jurnalist Şirin Əbu-Aqilənin Cenin şəhərində İsrail qüvvələri tərəfindən qətlə yetirilməsindən sonra işğal altında olan ərazilərdə vəziyyət daha da gərginləşib.