İran səhiyyə naziri İranda koronavirusa yoluxanların sayını açıqlayıb

İran İslam Respublikasının səhiyyə naziri İranda koronavirusa yoluxanların sayının beş nəfər olduğunu bildirib. O, vurğulayıb ki, İranda koronavirus mütləq aradan götürüləcək.

Rasthaber Azərbaycan İran mediasına istinadən xəbər verir ki, İran İslam Respublikasının prezidenti Həsən Ruhaninin göstərişi ilə İranda koronavirusla bağlı profilaktika və mübarizə qərargahının yaradıldığını bildirən Səid Nəməki deyib ki, bu qərargahın məsuliyyəti səhiyyə nazirinin öhdəsinə düşür.

"Koronavirusla bağlı profilaktika və mübarizə qərargahının ilk iclası İran İslam Respublikası Silahlı Qüvvələrinin Baş Qərargahı, Passiv Müdafiə Təşkilatı, Böhranın İdarə Olunması Təşkilatının məsul şəxsləri və bir qrup nazirin iştirakı ilə təşkil olunub və bu xəstəliyin aradan qaldırılması üçün qərarlar çıxarılıb.", -nazir bildirib.

İran İslam Respublikasının səhiyyə naziri qeyd edib ki, cari ilin payızında qrip epidemiyasının aradan qaldırıldığı kimi koronavirus xəstəliyi də nəzarətə alınacaqdır.

Ümumdünya Səhiyyə Təşkilatı bazar ertəsi günü bildirib ki, Çinin tibbi məlumatlarına əsasən, xəstələrin səksən faizindən çoxunda yüngül əlamətlər var və onlar sağalacaqlar.