HƏMAS Siyasi Bürosunun rəhbəri İsmayıl Haniyə bildirib ki, Təl-Əvivlə məhbus mübadiləsi razılaşması əldə etmək üçün İsrailin hücumlarını tamamilə dayandırması, Qəzzadan çəkilməsi və bölgənin yenidən qurulmasından başqa heç nə qəbul etməyəcəklər.

Az.rasthaber.com xəbər verir ki, Haniyə verdiyi yazılı açıqlamada bildirib:

"Həmas Fələstinlilərə qarşı hücumları dayandırmaq, ədalətsiz blokadaya son qoymaq, yardım, sığınacaq və yenidənqurma işlərini təmin etmək üçün həmişə müsbət ruh və yüksək məsuliyyət hissi ilə vasitəçilərə cavab verib".

HƏMAS-ın problemlərin həlli üçün tam çevikliklə hərəkət etdiyini qeyd edən Haniyə, İsrailin diqqəti yayındırma siyasətini davam etdirdiyini vurğulayıb.

Haniyə deyib:

"Fələstin müqaviməti olaraq İsrail ordusu hücumlarını dayandırmalı, Qəzzadan çəkilməli, ədalətsiz blokadanı aradan qaldırmalı, köçkün fələstinlilərə təhlükəsiz və lazımi sığınacaq verməlidir. Biz köçkünlərin, xüsusən də Qəzza zolağının şimalına qayıtması, barbar aclıq siyasətinə son qoyulması və Qəzzanın yenidən qurulmasından başqa heç nə qəbul etməyəcəyik".

Haniyə qeyd edib ki, İsrail Birləşmiş Millətlər Təşkilatı (BMT), insan haqları qurumları və Beynəlxalq Ədalət Məhkəməsinin (ICJ) qərarlarına uyğun olan bütün bu humanitar tələblərə əməl etməlidir.

İsrail həbsxanalarında saxlanılan bütün məhbusların, xüsusilə də yaşlıların və ağır cəzaya məruz qalan fələstinlilərin azad ediləcəyi bir mübadilə razılaşmasına nail olmağı hədəflədiklərini ifadə edən Haniyə, HƏMAS-ın davam edən danışıqları müsbət və yüksək məsuliyyətlə idarə etdiyini, lakin fələstinlilərin böyük fədakarlıqlarını və müqavimətin uğurlarını da vurğulayıb.

Haniyə İsrailin müdafiəsiz fələstinlilərə qarşı qanlı hücumlarını dayandırmaq üçün əllərində olan bütün imkanlarla çalışacaqlarını da qeyd edib.