İran İnqilab Keşikçiləri Ordusunun baş komandanı general-mayor Səlami ABŞ-ın siyasi arenada uğursuzluğa düçar olduğunu bəyan edərək, İranın düşmənlərinin artıq bir-birinə kömək belə edə bilməyəcəyini bildirib.

Az.rasthaber.com xəbər verir ki, İran İnqilab Keşikçiləri Ordusunun baş komandanı, general-mayor Hüseyn Selami dünən iştirak etdiyi tədbirdəki çıxışında, ABŞ-ın sanksiyalar və maksimum təzyiq strategiyasının uğursuzluğa düçar olduğunu qeyd edərək bildirib:

"İqtisadi müharibədə olduğumuz zaman məğlub ölkə şəklinə malik olmamağımız qələbəyə işarədir. Bu, xalqın ölkənin hərbi, mədəni və siyasi tərəqqiyə doğru getdiyinə inandığını göstərir".

General Səlami İranın düşmənlərinin artıq bir-birinə kömək belə edə bilməyəcəklərini deyib:

"Bu gün nə Səudiyyə Ərəbistanı Amerika üçün bir şey edə bilər, nə də Amerika Səudiyyə Ərəbistanı üçün. ABŞ-a maliyyə yardımı edən Səudiyyə Ərəbistanı indi iqtisadi problemlərini həll etməkdə acizdir".

General-mayor Səlami ABŞ prezidenti Baydenin Yaxın Şərqə səfərinə toxunaraq deyib:

"Bayden bölgəyə etdiyi son səfərdən əliboş qayıtdı və heç bir uğur qazanmadı. Bu, İnqilab Rəhbərinin regionda apardığı məlumatlandırma tədbirlərinin nəticəsidir".