İran İslam İnqilabının rəhbəri Təbrizlilərə xitabən çıxış edib

Rasthaber Azərbaycan İran mediasına istinadən xəbər verir ki,  Ayətullah Xamenei Təbriz əhalisinin 29 Bəhmən, 17 fevral qiyamının ildönümü münasibətilə Şərqi Azərbaycan vilayətinin nümayəndələri ilə videokonfrans formatında keçirilən görüşü zamanı bəzi mətləblərə toxunub.

O  Azərbaycanın (İran Azərbaycanı) xarici hücumlar qarşısında İranın möhkəm qalası olduğunu qeyd edərək "Biz həmişə təcavüzkar qonşu, istər Çar Rusiyası, istər Osmanlı İmperiyası və ya Sovet İttifaqı tərəfindən hücuma məruz qalmışıq və əgər Azərbaycan və Təbriz olmasaydı, əgər müqavimət göstərməsəydi və onların qarşısında dayanmasaydı, bu hücum ölkənin mərkəzi bölgələrini də əhatə edə bilərdi, Azərbaycan daim bu hücumları dəf edən və qarşısını alan möhkəm bir qala olub", - bildirib.

Ayətullah Xamenei sonra deyib:  "Təbriz bölgəsi və Azərbaycan iki sabit və daimi kimlik xüsusiyyətinə malik olub; Biri İslam dininə və müsəlmanlığa dərin bağlılıq,  digəri İrana qarşı güclü bir qeyrət və dəstəkdir. Bu müxtəlif dövrlərdə Azərbaycanda mövcud olub və azərbaycanlılar İslam və İrana o qədər əhəmiyyət veriblər və o qədər onların yolunda canfəşanlıq ediblər. Onlar dəfələrlə əcnəbilərin İranı parçalamaq və separatçılıq cəhdləri qarşısında dayanıblar və ölkənin bütövlüyünü qoruyublar, həqiqətən bariz və önəmli bir xüsusiyyətdir".

İslam İnqilabının Rəhbəri, həmçinin bu video görüşdə İran xalqını Rəcəb ayının gəlib çatması münasibətilə təbrik edib: " Ümid edirəm hər kəs bu ayın mənəvi nemətlərindən bəhrələnəcəkdir. Hazırda ictimai toplantılar qadağan edilib və keçən illərdəki kimi insanların ictimai ibadətlərdə, dua və zikr məclislərində iştirak etməsi bu il mümkün deyil, lakin evlərdə Rəcəb ayının dualarından qafil olmayın və ictimai toplantıların müvəqqəti qadağan edilməsi bizi bu mübarək ayın nemətlərindən, ibadətlərindən, dua və Allahaın dərgahına təvəssüldən məhrum etməməlidir".