İranın Çaharmahal-Bəxtiyari əyalətində təbii qaz kəmərlərində baş verən partlayışların arxasında İsrailin olduğu iddia edilib.
Az.rasthaber.com xəbər verir ki, “New York Times” qəzeti iki Qərb rəsmisi və İran İnqilabı Keşikçiləri Korpusuna bağlı bir hərbi strateqə əsaslanan hesabatında İranın Çaharmahal-Bahtiari əyalətinin Burucin rayonunda təbii qaz əsas paylayıcı boru kəmərində baş verən partlayışların arxasında İsrailin olduğunu iddia edib.
Xəbərdə “İsrailin bu həftə İranda iki böyük qaz kəmərinə gizli hücum təşkil etdiyi” iddia edilib.
Qəzetin mənbələrindən biri hücumun simvolik olduğunu və Yaxın Şərqdə artan gərginlik şəraitində İsrailin nə edə biləcəyi ilə bağlı Tehrana xəbərdarlıq olduğunu bildirib.
Qaz kəmərinə edilən hücumların partlayıcı yüklü pilotsuz təyyarələrlə, yoxsa başqa üsulla həyata keçirildiyi hələlik məlum deyil, eyni anda bir çox yerdə partlayışlar baş verdiyi bildirilib.
NYT-nin mənbələri həmçinin fevralın 15-də Tehran ətrafında bir fabrikdə baş verən partlayışa görə İsrailin məsuliyyət daşıdığını iddia edib.
