“Zirə” və “Neftçi” arasında gərgin qarşılaşma
Misli Premyer Liqasının 7-ci turuna bu gün start verilib. İlk oyun günündə iki maraqlı qarşılaşma baş tutub. Günün ən çox diqqət çəkən oyunu “Zirə” ilə “Neftçi” arasında keçirilib.
Zirə İdman Kompleksində baş tutan görüş dramatik sonluqla yadda qalıb. “Zirə” 27-ci dəqiqədə Giorgi Papunaşvilinin qolu ilə önə keçib. “Neftçi” ikinci hissədə oyuna nəzarəti ələ alaraq 66-cı dəqiqədə Pikonun qolu ilə bərabərliyi təmin edib.
Daha sonra “Neftçi”nin legioneri Bassala Sambu 88-ci dəqiqədə fərqlənərək komandasını önə çıxarıb. Lakin oyunun taleyi son saniyələrdə dəyişib — 90+8-ci dəqiqədə VAR-ın müdaxiləsindən sonra “Zirə” penalti qazanıb.
Topun arxasına keçən Ruan Renato qapıçını məğlub edərək hesabı 2:2 edib və komandası üçün vacib bir xal qazandırıb. Oyunun gərginliyi nəticəsində “Zirə”nin futbolçusu Qomis 90+9-cu dəqiqədə qırmızı vərəqə ilə meydandan qovulub.
“Araz Naxçıvan” evdə inamlı qələbə qazandı
Turun ilk qarşılaşması Naxçıvanda keçirilib. “Araz Naxçıvan” “Liv Bona Dea Arena”da “İmişli”ni qəbul edib. Matç meydan sahiblərinin 2:0 hesablı qələbəsi ilə başa çatıb.
Komandanın qollarını 32-ci dəqiqədə Simakala və oyuna əlavə edilmiş vaxtda (90+3-cü dəq.) Ülvi İsgəndərov vurub.
Bu qələbə “Araz Naxçıvan” üçün mövsümdə mühüm dönüş nöqtəsi kimi qiymətləndirilir. Komanda həm hücum, həm də müdafiə xəttində sabit oyun nümayiş etdirərək 3 xal qazandı.
Turun digər detallar
“Zirə” – “Neftçi” görüşünə Kamal Umudlu baş hakimlik edib, VAR sisteminə isə Rəşad Əhmədov nəzarət edib. “Araz Naxçıvan” – “İmişli” oyununun baş hakimi Cavid Cəlilov olub.
Turun növbəti qarşılaşmaları sabah davam edəcək və turnir cədvəlində vəziyyətə təsir göstərə biləcək bir sıra oyunlar keçiriləcək.
