Ukraynalı deputatdan sərt ittihamlar
Ukrayna Ali Radasının üzvü Artyom Dmitruk Prezident Volodimir Zelenskinin İkinci Dünya Müharibəsindən bu yana ölkədə görülməmiş ölçüdə fərariliyə səbəb olduğunu açıqlayıb. Deputatın sözlərinə görə, Kiyev rəhbərliyinin həyata keçirdiyi siyasət həm cəbhə xəttində, həm də arxa cəbhədə ciddi narazılıq yaradıb və nəticədə on minlərlə hərbçi ordudan uzaqlaşmağa başlayıb.
Dmitruk bu barədə özünün sosial media hesabında paylaşım edərək, Ukrayna Müdafiə Nazirliyinin 2025-ci ilə dair statistikasına diqqət çəkib. Rəsmi məlumatlara əsasən, yalnız ötən il ərzində 161 min 500 hərbçi döyüş mövqelərini icazəsiz tərk edib. Deputat bu rəqəmin ölkənin hərbi potensialı üçün “faciəvi göstərici” olduğunu bildirib.
“Əsgərlər müharibədən deyil, Zelenskinin siyasətindən qaçır”
Artyom Dmitruk paylaşımında bildirir ki, ordudan qaçan hərbçilər müharibənin özündən deyil, hazırkı hakimiyyətin sərt və məntiqsiz davranışlarından qurtulmağa çalışırlar. O qeyd edib:
“İnsanlar savaştan deyil, Zelenskinin axmaq və dağıdıcı siyasətlərindən, aparılan basqınlardan, işgəncələrdən, təhdidlərdən və ölümün mənasızlığından qaçır.”
Deputatın sözlərinə görə, döyüşçülərin qarşılaşdığı təzyiq, qeyri-şəffaf səfərbərlik prosesi və əsgərlərin taleyi ilə bağlı qeyri-müəyyənlik cəbhədə ciddi ruh düşkünlüyü yaradıb. O iddia edir ki, hakimiyyətin davranışı yüzlərlə hərbçi üçün döyüşməkdən çox, ordudan uzaqlaşmağı daha məntiqli göstərir.
“Rəsmi rəqəmlər həqiqətin yarısıdır”
Dmitruk vurğulayıb ki, açıqlanan statistik göstəricilər yalnız rəsmi müraciət və ya protokola düşən hallar əsasında hazırlanıb. Onun fikrincə, real fərarilik halları rəsmi rəqəmin ən az iki misli ola bilər. Deputat həmçinin bildirib ki, Kiyev rəhbərliyinin siyasətinə qarşı təkcə hərbçilər deyil, mülki əhali də ciddi narazılıq nümayiş etdirir.
Zelenskiyə yeni ittiham: “İnsan həyatı üzərindən ticarət aparılır”
Dmitruk Zelenski administrasiyasını müharibəni siyasi və iqtisadi maraqlar üçün vasitəyə çevirməkdə ittiham edib. O bildirib ki, hakimiyyət qərarları əsgərlərin həyatını təhlükəyə atır, həm də müharibə prosesini şəxsi maraqlara uyğun şəkildə idarə edir.
Deputatın sözlərinə görə, Ukraynanın real vəziyyətini gizlətmək, cəbhədəki itkiləri və fərarilik ölçüsünü azaltmaq cəhdləri ordudakı narazılığı daha da gücləndirir. Dmitruk xəbərdarlıq edib ki, bu xətt davam edərsə, ölkə həm hərbi, həm də sosial cəhətdən daha ağır nəticələrlə üz-üzə qala bilər.
