Yəmən İsrailə qarşı yeni hücumlar həyata keçirdi
Yəmən Silahlı Qüvvələri İsrailə qarşı növbəti hərbi əməliyyatlarını elan edib. Ordunun rəsmi nümayəndəsi, briqada generalı Yəhya Səriə bu gün açıqlamasında bildirib ki, Yəmən raket və pilotsuz uçuş aparatları ilə İsrailin işğal etdiyi Yafa və Ümm ər-Rəşraş bölgələrində yerləşən “həssas hədəfləri” vurub.
Yafaya qarşı “Fələstin-2” ballistik hücumu
Yəmən Ordusu Sözcüsü Yəhya Sərinin sözlərinə görə, ilk əməliyyat çərçivəsində raket qoşunları “Fələstin-2” tipli, çoxsaylı başlıqlara malik hipersəs ballistik raketindən istifadə edib. Hədəf Yafa şəhərindəki mühüm obyektlər olub. Yəmən ordusu əməliyyatın uğurla nəticələndiyini, İsraildə milyonlarla insanın həyəcan siqnalları səbəbindən sığınacaqlara üz tutduğunu bildirib.
Ümm ər-Rəşraşda PUA hücumu
İkinci əməliyyat isə Hava Qüvvələrinin pilotsuz təyyarələri ilə həyata keçirilib. İki zərbəçi PUA İsrailin Ümm ər-Rəşraş bölgəsindəki strateji obyektləri hədəfə alıb. Bu əməliyyatın da məqsədlərinə çatdığı qeyd olunub.
Əməliyyatların məqsədi
Yəmən ordusu bəyan edib ki, bu hücumlar İsrailin Yəmənə qarşı davam edən hərbi təxribatlarına cavab olaraq reallaşdırılıb. Yəhya Səri vurğulayıb ki, əməliyyatlar həm də Fələstin xalqının haqlı mübarizəsinə dəstək, Qəzza zolağında baş verən soyqırım xarakterli hücumlara cavab mahiyyəti daşıyır.
O əlavə edib ki, “ərəb və müsəlman dünyasının yeganə yolu işğalçıya qarşı dirəniş və mübarizədir”. Yəmən Silahlı Qüvvələri İsrailin Qəzzaya hücumlarını dayandırana və blokadanı qaldırana qədər bu əməliyyatların davam etdiriləcəyini bəyan edib.
İsrailin reaksiyası
İsrail mediasının məlumatına görə, bazar ertəsi gecəyarısı Yəmən ərazisindən buraxılan raketlər nəticəsində Təl-Əviv və Qüdsdə hava həyəcan siqnalları çalınıb. Ben Qurion hava limanında bütün uçuş və eniş əməliyyatları müvəqqəti olaraq dayandırılıb.
