Yəməndə Qəzzaya həmrəylik yürüşləri
Yəmənin Səna, Rayma və Mərib vilayətlərində minlərlə insan küçələrə çıxaraq Qəzzada davam edən qətliam və İsrailin hücumlarını pisləyib. “Qəzzanın yanındayıq… İstənilən vəhşiliklərə baxmayaraq, xainliyə boyun əyməyəcəyik” şüarı altında keçirilən yürüşlərdə iştirakçılar Fələstin xalqına dəstəklərini bir daha nümayiş etdiriblər.
Aksiya iştirakçıları Fələstin müqavimətinə dəstəyin Yəmən xalqının dəyişməz mövqeyi olduğunu vurğulayıb və beynəlxalq ictimaiyyəti Qəzzadakı insanlıq faciəsinə laqeyd qalmamağa çağırıblar.
Sənada milyonluq aksiya gözlənilir
Məlumata görə, bu gün günorta saatlarında paytaxt Sənanın Səbəin meydanında, həmçinin digər bölgələrdə genişmiqyaslı mitinqlərin keçirilməsi planlaşdırılır. Yüz minlərlə insanın iştirak edəcəyi gözlənilən bu nümayişlər Qəzza ilə həmrəylik və İsrailin davamlı hücumlarına qarşı etiraz məqsədi daşıyır.
Husi rəhbərindən açıqlama
“Ənsarullah” hərəkatının lideri Əbdülməlik əl-Husi ötən gün xalqa müraciətində Yəmən ordusunun İsrailə qarşı raket və pilotsuz uçuş aparatları ilə əməliyyatlarını davam etdirdiyini bildirib. Onun sözlərinə görə, yalnız bu həftə ərzində İsrail hədəflərinə qarşı 24 raket və PUA hücumu həyata keçirilib. Əl-Husi əlavə edib ki, Yəmən qüvvələrinin hədəfi məhz İsrailə məxsus gəmilər və obyektlərdir.
“İslam ümməti məsuliyyətdən qaça bilməz”
Əl-Husi çıxışında İsrailin təhlükələrinin yalnız Fələstinlə məhdudlaşmadığını, bütün İslam dünyasını hədəfə aldığını qeyd edib. O, müsəlman ölkələrini biganə qalmamağa çağıraraq, Qəzzadakı soyqırımı seyr etməyin heç bir halda məsuliyyəti aradan qaldırmayacağını və bunun həm dünyada, həm də axirətdə ağır nəticələr doğuracağını vurğulayıb.
Bu yürüşlər, Yəmən xalqının Fələstinlə həmrəylik mövqeyini davam etdirdiyini və İsrailin hərbi əməliyyatlarına qarşı açıq etirazını bir daha ortaya qoymuş oldu.
