Yəmən ordusundan Yafaya raket hücumu
Yəmən Silahlı Qüvvələrinin sözçüsü, briqada generalı Yəhya Səri açıqlayıb ki, ordunun raket birləşmələri İsrailin işğal altındakı Yafada mühüm hədəfləri vurub. Onun sözlərinə görə, hücumda “Fələstin-2” adlı hipersəs ballistik kaset raketi istifadə olunub.
Rəsmi bəyanatda qeyd olunub ki, raket uğurla hədəflərə çatıb və nəticədə minlərlə işğalçı təcili olaraq sığınacaqlara qaçmağa məcbur olub.
“Yəmən xalqı geri çəkilməyəcək”
Yəmən Silahlı Qüvvələrinin bəyanatında vurğulanıb ki, İsrailin Qəzzada həyata keçirdiyi amansız hücumlara baxmayaraq, Yəmən xalqı Fələstinlilərlə həmrəylik mövqeyindən dönməyəcək.
General Yəhya Səri çıxışında bildirib:
“İsrail rejiminin Yəmənə qarşı həyata keçirdiyi cinayətkar hücumlar xalqımızı geri çəkilməyə məcbur edə bilməz. Əksinə, bu, yalnız müqavimətimizi gücləndirir və haqq yolunda mübarizəmizi davam etdirməyə sövq edir.”
Hücumların davamı istisna edilmir
Yəmən ordusu həm raket, həm də pilotsuz uçuş aparatları ilə İsrailin müxtəlif hədəflərinə hücumlar təşkil etdiyini, bu əməliyyatların işğalçılara təzyiqi artırmaq məqsədi daşıdığını bildirib.
Qeyd edək ki, son həftələr ərzində Yəmən qüvvələri dəfələrlə İsrailin müxtəlif şəhərlərinə raket və PUA hücumları həyata keçirib. Hər dəfə hədəfin “həyati əhəmiyyət daşıyan obyektlər” olduğu açıqlanıb.
Müşahidəçilər hesab edirlər ki, Yəmənin hücumları regionda gərginliyi daha da artırır və İsrailin Yaxın Şərqdə genişlənən müharibə ilə üzləşməsinə gətirib çıxarır. Yəmən tərəfi isə bu əməliyyatların Qəzzada mühasirəyə alınmış fələstinlilərə dəstək məqsədi daşıdığını vurğulayır.
