“İsrail” müharibəni hərbi texnologiyalarını satmaq üçün vitrin kimi istifadə edir
“Wall Street Journal”ın məlumatına görə, bu həftə İsrailin “təhlükəsizlik” nazirliyinin himayəsi ilə keçirilən genişmiqyaslı hərbi texnologiya konfransına Almaniya, Norveç, Böyük Britaniya da daxil olmaqla bir çox ölkənin rəsmiləri qatılıb. Konfransda Qəzza, Livan və İran üzərində aparılan əməliyyatlarda sınaqdan keçirilmiş ən yeni döyüş texnologiyaları nümayiş etdirilib.
Qəzet yazır ki, İsrail Qəzza müharibəsini öz silahlarının təsir gücünü nümayiş etdirmək və marketinq üçün istifadə edir. ABŞ və Avropadan gələn alıcılar isə bu texnologiyalara getdikcə daha çox maraq göstərirlər.
Avropa sürətlə yenidən silahlanır
Avropada Rusiyaya qarşı hərbi hazırlığın artırılması tələbləri fonunda, qitənin bir çox ölkəsi İsrail istehsalı sistemlərə diqqət yetirir. Bununla belə, bəzi dövlətlər Qəzzada davam edən hücumlar səbəbindən siyasi narahatlıq yaşadıqlarını bildirirlər.
Konfransda ABŞ hökumətinin nümayəndələri ilə yanaşı Hindistan, Özbəkistan, Sinqapur və Kanadadan yüksək səviyyəli menecerlər və investorlar da iştirak edib. Təşkilatçılar ötən illə müqayisədə marağın daha çox olduğunu bildirərək, “diplomatik təcridə baxmayaraq, İsrail hərbi texnologiyalarının hələ də cəlbedici olduğunu” vurğulayıblar.
“Hets-3” ilk dəfə Almaniyada tam istifadəyə verildi
WSJ qeyd edir ki, Almaniyanın İsraildən aldığı Hets-3 hava müdafiə sistemi artıq tam istifadəyə buraxılıb. Bu, sistemin işğal altındakı ərazilər və ABŞ-dan kənarda ilk əməli yerləşdirilməsidir.
İsrail silah ixracı rekord qırır
Məlumata görə, İsrailin silah ixracı 2024-cü ildə 14,8 milyard dollarla rekord həddə çatıb. Xüsusilə Avropa ölkələrinin İsrail “müdafiə texnologiyalarına” tələbatında ciddi artım var.
Konfransda iştirak edən Elbit, Rafael kimi böyük İsrail şirkətləri də beynəlxalq tərəfdaşlarla yeni və böyük müqavilələr imzaladıqlarını təsdiqləyiblər.
