Trampdan qalmaqallı açıqlama
ABŞ prezidenti Donald Tramp bazar ertəsi günü verdiyi açıqlamada Venesuelanın hazırda ABŞ tərəfindən idarə olunduğunu bir daha təsdiqləyib. O, Venesuela prezidenti Nikolas Maduronun həbsindən sonra Vaşinqtonun Karakasdakı yeni rəhbərliklə işlədiyini bildirib. Trampın bu sözləri beynəlxalq aləmdə ciddi rezonans doğurub və ABŞ-ın Venesuelaya dair real məqsədləri ilə bağlı sualları artırıb.
Prezident jurnalistlərə “Air Force One” təyyarəsində verdiyi açıqlamada, Venesuelanın müvəqqəti prezidenti Delsi Rodrigeslə əlaqə saxlayıb-saxlamadığı barədə suala belə cavab verib: “Biz yeni and içmiş şəxslərlə işləyirik. Kim idarə edir deyə soruşmayın, çünki cavabım çox mübahisəli olacaq”.
“Venesuelanı biz idarə edirik”
Trampdan bu ifadələrin mənası soruşulduqda isə o, açıq şəkildə bildirib: “Bu o deməkdir ki, Venesuelada işləri biz idarə edirik”. ABŞ prezidentinin bu bəyanatı suveren dövlətin daxili işlərinə birbaşa müdaxilə kimi qiymətləndirilir və beynəlxalq hüquq baxımından tənqid olunur.
Eyni zamanda, Tramp administrasiyası Maduronun əvvəlki komandasında qalan bəzi rəsmilərlə əməkdaşlıq ehtimalını da istisna etmir. Bunun üçün əsas şərt kimi Venesuelanın böyük neft ehtiyatlarının ABŞ şirkətləri üçün açılması göstərilir.
Seçkilər təxirə salınır
Donald Tramp Venesuelada seçkilərin təxirə salınacağını da açıqlayıb. Onun sözlərinə görə, Vaşinqton seçkiləri “düzəldəcək, təşkil edəcək və uyğun vaxtda keçirəcək”. Tramp bildirib ki, əsas problem seçkilər yox, “dağıdılmış dövlətin bərpasıdır”.
Qeyd edək ki, Tramp daha əvvəl Delsi Rodrigesi ABŞ-la əməkdaşlıq etməyəcəyi təqdirdə “ağır nəticələrlə” hədələmişdi. Buna baxmayaraq, Rodriges ABŞ administrasiyası ilə işləməyə hazır olduğunu, lakin münasibətlərin balanslı və qarşılıqlı hörmətə əsaslanmalı olduğunu bəyan edib.
ABŞ-ın Venesuela strategiyası nədir?
Vaşinqtonun açıqlamalarına baxmayaraq, ABŞ-ın Venesuelaya dair strategiyası aydın görünmür. ABŞ dövlət katibi Marko Rubio bildirib ki, ABŞ “tam rejim dəyişikliyi” məqsədi güdmür. Onun sözlərinə görə, Vaşinqton Venesuelaya qarşı deyil, narkotik ticarəti şəbəkələrinə qarşı mübarizə aparır.
Bununla yanaşı, Rubio ABŞ-ın təzyiqləri davam etdirəcəyini, xüsusilə Karib dənizində ABŞ Hərbi Dəniz Qüvvələri tərəfindən tətbiq olunan neft ixracı blokadasının saxlanılacağını vurğulayıb. Tramp isə zərurət yaranacağı halda ikinci hərbi əməliyyat dalğasının mümkünlüyünü istisna etməyib.
Konqresdə narahatlıq, müxalifətdən şərtli dəstək
ABŞ Konqresində də Venesuela məsələsi ilə bağlı ciddi müzakirələr gedir. Məlumata görə, Marko Rubio bu mövzuda qanunvericilərlə qapalı görüşlər keçirəcək.
Venesuelalı müxalif siyasətçi Edmundo Qonsales Urrutia isə Maduronun həbsini “əhəmiyyətli, lakin yetərsiz addım” adlandırıb. İspaniyadakı sürgündən yayımladığı videomüraciətdə o, Venesuelanın normallaşmasının yalnız siyasi səbəblərlə həbs olunan bütün şəxslərin azadlığa buraxılması ilə mümkün olacağını bildirib.
Hərbi müdaxilə və prezidentin oğurlanması
Xatırladaq ki, ABŞ şənbə günü Venesuelanın paytaxtı Karakasa qarşı hərbi hücum həyata keçirib. Hücum zamanı limanlar, hava limanları və hərbi bazalar hədəfə alınıb. Rəsmi məlumata görə, prezident Nikolas Maduro və həyat yoldaşı saxlanılaraq gəmi vasitəsilə Nyu-Yorka aparılıb. Bu hadisə beynəlxalq ictimaiyyətdə geniş qınaqla qarşılanıb.
