ÜST: Sudanda tibb müəssisələri hədəfə alınır
Ümumdünya Səhiyyə Təşkilatının (ÜST) baş direktoru Tedros Adhanom Qebreyesus Sudanla bağlı ciddi xəbərdarlıq yayıb. O, “X” platformasında paylaşdığı açıqlamada ölkədə səhiyyə müəssisələrinə qarşı hücumların fasiləsiz davam etdiyini və bunun insanların təcili tibbi yardıma çıxışını tamamilə məhdudlaşdırdığını bildirib.
Qebreyesus qeyd edib ki, Qərbi Kordofanda yerləşən ən böyük tibb mərkəzlərindən biri olan Nuhud xəstəxanasının böyük hissəsi bağlanıb və yerli əhali lazımi tibbi xidmətlərdən məhrum qalıb.
“Səhiyyə işçiləri öldürülür, xəstəxanalar fəaliyyətini dayandırır”
ÜST rəhbəri, “Həkimlər Sərhəd Tanımır” təşkilatının bu ay Zalinci şəhərində yerləşən xəstəxanadan bir tibb işçisinin öldürülməsindən sonra geri çəkilməsinə də toxunub. Onun sözlərinə görə, yalnız 2023-cü ilin aprelindən bəri ÜST ümumilikdə 198 səhiyyə müəssisəsinə hücumu sənədləşdirib.
Bu hücumlar nəticəsində 1735 tibb işçisi və pasiyent həlak olub, 438 nəfər yaralanıb. Qebreyesus bildirib ki, rəqəmlər bölgədəki humanitar böhranın dərinliyini açıq şəkildə göstərir.
“Bu hücumlar beynəlxalq humanitar hüququn açıq pozuntusudur”
Qebreyesus tibbi müəssisələrə hücumların beynəlxalq humanitar hüququn kobud şəkildə pozulması olduğunu vurğulayıb və onların dərhal dayandırılmasını tələb edib. O, bütün tərəfləri xəstələrin, tibb işçilərinin və səhiyyə infrastrukturlarının təhlükəsizliyinin təmin edilməsinə çağırıb.
ÜST rəhbərinin sözlərinə görə, səhiyyənin hədəfə alınması həm humanitar, həm də hüquqi baxımdan qəbuledilməzdir və beynəlxalq ictimaiyyət bu məsələyə biganə qala bilməz.
