Ümmül-Bənin xanımın vəfatının ildönümü – Əhli-Beyt (ə.s) aşiqlərinə başsağlığı
Hicri-qəməri təqvimi ilə Cəmadiüs-sani ayının 13-ü, Həzrət Əmirəl-möminin Əli ibn Əbi Talibin (ə) sədaqətli həyat yoldaşı və Kərbəla qəhrəmanı Həzrət Əbəlfəzl Abbasın (ə) anası olan Həzrət Ümmül-Bənin xanımın (salamullah əleyha) vəfatının ildönümü günüdür.
Bu münasibətlə Əhli-Beyt (əleyhimussəlam) aşiqlərinə, Kərbəla şəhidlərinin xatirəsini yaşadan bütün mömin bacı-qardaşlara təsəlli və başsağlığı verilir. Ümid edilir ki, bu gün möminlər öz qəm və hüznlərini İmam Zamanın (əccəlallahu fərəcəhuş-şərif) hüzuruna ərz edərək o Həzrətin xüsusi diqqətinə nail ola bilərlər.
Ümmül-Bənin kimdir? – Qəhrəman oğulların anası
Ümmül-Bənin adı ilə tanınan Həzrət Fatimə binti Hizzam (s.ə), Əmirəl-möminin Əli ibn Əbi Talibin (ə) həyat yoldaşı olmuş, Peyğəmbər (s) və Əhli-Beyt (ə) davamçıları arasında böyük məqam və hörmət qazanmış fəzilətli bir xanımdır.
O, Aşura günü Kərbəla səhrasında İmam Hüseynin (ə) yanında qəhrəmancasına şəhid olan Həzrət Əbəlfəzl Abbasın (ə) anasıdır. Həmçinin bu qanlı hadisədə şəhid olan digər üç oğlu – Abdullah, Cəfər və Osman (Allah məqamlarını uca etsin) – də İmam Hüseynin (ə) yolunda canlarını fəda ediblər.
Kərbəla hadisəsindən sonra Ümmül-Bənin (s.ə), İmam Hüseyn (ə) və onun övladları üçün elə dərin və davamlı matəm saxlayırdı ki, hətta Əhli-Beyt (ə) düşmənləri belə onunla birgə ağlayır, bu böyük müsibətin təsiri altında qalırdılar.
Nəsəbi və Mədinədəki mübarək məzarı
Tarixi mənbələrdə qeyd olunur ki, Ümmül-Bənin xanımın (s.ə) atası Əbul-Məcl Hizzam ibn Xalid əl-Kəlabi, anası isə Leyla və ya Təmamə binti Suheyl ibn Amir ibn Malik olmuşdur. O, şücaətləri ilə tanınan Bəni-Kəlab qəbiləsinə mənsub idi və bu nəslin igidliyi ərəb tayfaları arasında məşhur idi.
Xanımın vəfat tarixi barədə müxtəlif rəvayətlər mövcud olsa da, məşhur rə’yə görə, o, hicrətin 64-cü ilində, Cəmadiüs-sani ayının 13-də dünyadan köçmüşdür. Müqəddəs qəbri Mədinə şəhərində, Əhli-Beyt (ə) xanımlarının və bir çox səhabələrin dəfn olunduğu Bəqi qəbiristanlığında yerləşir.
İmam Əli (ə) ilə izdivacı və “Ümmül-Bənin” adının sirri
Həzrət Fatimə Zəhranın (s.ə) şəhadətindən sonra İmam Əli (ə) qardaşı Əqil ilə məsləhətləşərək, qəhrəman və şücaətli oğullar dünyaya gətirə biləcək nəcib bir xanımla evlənmək istədiyini bildirir. Əqil ibn Əbi Talib ərəblər içində nəsəbləri yaxşı tanıyan şəxs olduğu üçün Hizzamın qızı Fatiməni tövsiyə edir.
Bu izdivacdan dörd igid oğul – Əbülfəzl Abbas (ə), Abdullah, Cəfər və Osman dünyaya gəlir və hamısı da Kərbəla səhnəsində İmam Hüseynin (ə) yolunda şəhid olurlar.
Rəvayətlərə görə, xanım Fatimə binti Hizzam (s.ə) İmam Əlidən (ə) xahiş etmişdi ki, İmam Həsən (ə) və İmam Hüseynin (ə) yanında onu “Fatimə” deyil, “Ümmül-Bənin” (oğlanlar anası) deyə çağırıb səsləsin. Çünki “Fatimə” adını eşidəndə uşaqların anaları Həzrət Zəhranın (s.ə) acı xatirələrini xatırlayıb kədərlənməsini istəmirdi. Bu ədəb və zəriflik onun yüksək mərifət və qeyrət nişanəsidir.
İmam Hüseynə (ə) sevgi – övladlardan da üstün
Tarixi mənbələr Ümmül-Bəninin (s.ə) imamətə olan imanı və bağlılığını xüsusi vurğulayır. Kərbəla xəbəri Mədinəyə çatanda ona əvvəlcə oğullarının şəhadəti çatdırılsa da, o, bir neçə dəfə İmam Hüseyn (ə) haqqında soruşmuş, nəhayət, Hüseynin (ə) şəhadətini eşidəndə belə demişdir:
“Kaş oğullarımın hamısı və yer üzündə nə varsa Hüseynə (ə) fəda olaydı, təki o sağ qalsaydı.”
Bu cümlə onun imamı və həqiqi rəhbəri hər şeydən üstün tutan əqidəsini, dərin mənəvi məqamını göstərir.
Alimlərin dili ilə Ümmül-Bənin xanım
Böyük alim Zeynəddin Amili (Şəhid Sani) Ümmül-Bənin xanımı belə təsvir edir:
“O, son dərəcə mərifətli və fəzilətli bir qadın idi. Peyğəmbər ailəsinə (s) qarşı böyük məhəbbət, ixlas və möhkəm bağlılığa sahib idi. Özünü tamamilə onlara xidmətə həsr etmişdi. Peyğəmbər ailəsi də (ə) onu yüksək məqam sahibi bilir, ona xüsusi ehtiram göstərirdilər. Bayram günlərində ona ehtiram naminə onun hüzuruna gəlib qayğı göstərirdilər.”
Bu məqam, Ümmül-Bəninin (s.ə) təkcə Kərbəla ilə deyil, bütövlükdə Əhli-Beyt məktəbi ilə necə sıx bağlı olduğunu göstərir.
Dualı xatırlatma
Möminlər bu hüznlü gündə, Ümmül-Bənin xanımın (s.ə) vəfatını yad edərək, öz qəm və ehtiyaclarını İmam Zamanın (əccəlallahu fərəcəhuş-şərif) hüzuruna ərz etməklə həm bu böyük Xanıma ehtiram göstərir, həm də onun uca məqamı xatirinə ilahi rəhmət və mərhəmət diləyirlər. İnşaallah, bu möhtərəm Xanınmın hörmətinə bütün Əhli-Beyt aşiqləri şəfaətə nail olanlardan olar.
