Trampın təkrarlanan “müharibə bitir” mesajları
ABŞ-ın “Aksios” nəşri xəbər verir ki, prezident Donald Tramp İranla davam edən müharibənin tezliklə başa çatacağını azı 12 dəfə dilə gətirib. Bu açıqlamalar müxtəlif tarixlərdə səsləndirilsə də, ümumi məzmun baxımından münaqişənin yaxın zamanda sona çata biləcəyinə dair siqnallar verir.
Nəşrin məlumatına görə, Tramp xüsusilə son günlərdə bu istiqamətdə mesajlarını intensivləşdirib. O, ABŞ ictimaiyyətini inandırmağa çalışır ki, münaqişə uzunmüddətli müharibəyə çevrilməyəcək. Lakin onun bəyanatları tez-tez bir-biri ilə ziddiyyət təşkil edir.
Hədələr və sülh siqnalları paralel gedir
Tramp bazar ertəsi “Truth Social” platformasında etdiyi paylaşımda İranın enerji və su infrastrukturunu məhv etməklə hədələyib. O bildirib ki, əgər Hörmüz boğazı dərhal kommersiya üçün açılmazsa, ABŞ bu obyektləri hədəfə alacaq.
Bununla yanaşı, o, eyni gün və əvvəlki açıqlamalarında müharibənin yaxın zamanda bitə biləcəyini də qeyd edib. Martın 26-da Nazirlər Kabinetinin iclasında Tramp “Onlar məğlub olublar və geri qayıda bilməzlər” deyərək qələbə iddiası səsləndirib.
Erkən qələbə iddiaları
Martın 24-də isə Tramp müharibənin artıq başa çatdığını iddia edərək İranın rejim dəyişikliyi ilə üzləşəcəyini söyləyib. O, jurnalistlərə “Bu müharibədə qalib gəldik” ifadəsini işlədib.
Bir gün əvvəl – martın 23-də isə ABŞ və İran arasında “yaxşı və məhsuldar danışıqlar” aparıldığını bildirərək mümkün sülh razılaşmasına işarə edib.
“Müharibə nə vaxt bitəcəyini hiss edirəm”
Tramp martın 13-də “Fox News” kanalına müsahibəsində müharibənin nə vaxt bitəcəyini “daxili hissləri ilə” müəyyən etdiyini bildirib və bunun uzun çəkməyəcəyini vurğulayıb.
Martın 12-də isə o, müharibənin artıq son mərhələyə çatdığını desə də, bunun dərhal bitməyəcəyini qeyd edib. Martın 11-də “Aksios”a açıqlamasında isə “demək olar ki, hədəf qalmayıb” deyərək müharibənin tezliklə bitəcəyini bildirib.
Eyni gün etdiyi çıxışda əvvəlcə qələbəni elan edən Tramp, bir neçə dəqiqə sonra “missiyanı tamamlamalıyıq” deyərək geri çəkilməyəcəklərini vurğulayıb.
ABŞ-ın hərbi əməliyyatları davam edir
Martın 9-da Respublikaçılar konfransında çıxış edən Tramp ABŞ-ın artıq çoxsaylı qələbələr əldə etdiyini, lakin “yekun qələbə” üçün mübarizənin davam etdiyini bildirib.
Martın 2-də isə o, ABŞ-ın “istənilən bahasına olsa belə asanlıqla qalib gələcəyini” deyib. Eyni gün “ABC News”a müsahibəsində əməliyyatın tam uğurlu olduğunu iddia edib.
Hazırda ABŞ və İsrail fevralın 28-dən etibarən İrana qarşı birgə hərbi əməliyyatlarını davam etdirir. Hücumlar əsasən yaşayış məntəqələri, dövlət və mülki infrastruktur obyektlərini hədəf alır.
Ziddiyyətli strategiya diqqət mərkəzində
Trampın ardıcıl olaraq həm qələbə elan etməsi, həm də müharibənin davam etdirilə biləcəyini bildirməsi onun strategiyasının qeyri-müəyyənliyini ortaya qoyur. Bu isə həm beynəlxalq arenada, həm də ABŞ daxilində suallar doğurmaqdadır.
