Trampın səhhəti yenidən gündəmdə: Ağ Ev iddiaları rədd edir
ABŞ Prezidenti Donald Trampın son dövrlərdə ictimai tədbirlərdə yuxulu görünməsi onun səhhəti ilə bağlı yeni suallar doğurub. Xüsusilə Ağ Evdə keçirilən son tədbirlərdən birində kameraların Trampın bir neçə saniyəlik gözlərini yumduğunu qeydə alması müzakirələri daha da gücləndirib. Həmin vaxt ABŞ dövlət katibi Marko Rubio xarici siyasətlə bağlı çıxış edirdi.
Trampın həqiqətən yuxuya getdiyi, yoxsa sadəcə qısa fasilə verdiyi dəqiq bilinməsə də, bu görüntülər onun sağlamlıq vəziyyəti ətrafında yaranan narahatlıqların artmasına səbəb olub. Ağ Ev isə bu iddiaları ardıcıl şəkildə rədd edərək prezidentin səhhətinin yaxşı olduğunu bildirir.
Göyərmələr və yavaşlayan iş qrafiki
Son aylarda Trampın əllərində görünən göyərmələr, bəzi görüşlər zamanı dalğın təsir bağışlaması və ilk prezidentlik dövrü ilə müqayisədə daha yavaş ictimai iş qrafiki diqqət çəkir. Sentyabrın 11-də Pentaqonda keçirilən anım mərasimində Trampın üzünün sağ tərəfində müşahidə edilən sallanma sosial şəbəkələrdə insult ehtimalı ilə bağlı şayiələrə səbəb olub. Administrasiya bu iddiaları qətiyyətlə təkzib edib.
Bu müzakirələrdən sonra “New York Times” qəzetinin mövzu ilə bağlı dərc etdiyi məqalə Trampın sərt reaksiyası ilə qarşılanıb. Prezident “Truth Social” platformasında paylaşdığı uzun yazıda nəşri “təxribatçı” və “bəlkə də xəyanət xarakterli” jurnalistikada ittiham edib.
Həkimlərin fərqli mövqeyi
Ağ Ev Trampın əllərindəki göyərmələri onun ictimaiyyət nümayəndələri ilə tez-tez əl sıxması ilə izah edib. Lakin bəzi tibb mütəxəssisləri bu açıqlamaya şübhə ilə yanaşıblar. ABŞ mediasına danışan həkimlər göyərmələrin tibbi prosedurlar, kiçik travmalar və ya digər səbəblərdən qaynaqlana biləcəyini bildiriblər.
Nyu-Yorkda fəaliyyət göstərən uroloq və kişi sağlamlığı üzrə mütəxəssis Bobak Berukhim məmurların nəyisə gizlətməyə çalışdığını deyib. Onun sözlərinə görə, bu izlər qan analizi, həşərat dişləməsi və ya sadə zərbə nəticəsində də yarana bilər.
Siyasi mübahisə və müqayisələr
Ağ Evin rəsmi qeydlərinə əsasən, Trampın hazırkı ictimai iş günü adətən günün daha gec saatlarında başlayır və 2017-ci illə müqayisədə bu il qatıldığı rəsmi tədbirlərin sayı xeyli azdır. Müxalifət nümayəndələri, o cümlədən Kaliforniya qubernatoru Qavin Nyusom Trampın vəzifəyə yararlılığı ilə bağlı açıq suallar səsləndirirlər.
Trampın tərəfdarları isə səhhətlə bağlı diqqətin siyasi motivli olduğunu bildirir və ABŞ prezidentlərinin sağlamlığı məsələsinin tarixən gizli saxlanıldığını xatırladırlar. Corc Vaşinqton Universitetinin tarixçisi Metyu Dallek qeyd edib ki, prezident köməkçiləri adətən səhhət problemlərini idarə etməyə və ya kiçiltməyə çalışıblar.
Ağ Evin mövqeyi dəyişmir
Bütün bu müzakirələrə baxmayaraq, Ağ Ev Trampın vəzifəsini tam şəkildə icra etmək qabiliyyətində olduğunu vurğulayır və səsləndirilən iddiaları siyasi rəqiblər və media tərəfindən şişirdilən spekulyasiyalar kimi qiymətləndirir.
Qeyd edək ki, sabiq prezident Co Bayden də dəfələrlə ictimai tədbirlərdə gözlərini yumarkən kameralara düşüb və ABŞ-da “Yuxulu Co” ləqəbi ilə tanınıb. Məhz bu ifadəni Tramp 2020-ci il seçkiləri ərəfəsində Baydenə qarşı siyasi kampaniyalarında geniş şəkildə istifadə edib.
