Trampdan Rodrigezə üstüörtülü hədələr
ABŞ prezidenti Donald Trump Venesuela rəhbərliyinə qarşı sərt açıqlamalarla çıxış edib. Tramp ABŞ-ın “The Atlantic” jurnalına telefon müsahibəsində Venesuelanın vitse-prezidenti, eyni zamanda müvəqqəti prezident təyin olunan Delsi Rodrigezə üstüörtülü təhdid ünvanladığını bildirib.
Trampın sözlərinə görə, Rodrigez ABŞ-ın tələblərinə uyğun davranmayacağı təqdirdə, “çox ağır, bəlkə də Madurodan daha böyük bir bədəl” ödəyəcək. Jurnal Trampdan sitat gətirərək qeyd edib ki, ABŞ prezidenti Venesuela rəhbərliyinin Vaşinqtonun hərbi müdaxiləsinə qəti şəkildə qarşı çıxmasını qəbul etmir.
Maduro əməliyyatı və Vaşinqtonun mövqeyi
Müsahibədə Tramp, ABŞ-ın hərbi müdaxiləsi nəticəsində Venesuela prezidenti Nicolas Maduronun saxlanılması ilə bağlı addımları da müdafiə edib. O bildirib ki, bu müdaxilə ABŞ-ın maraqları çərçivəsində həyata keçirilib və Vaşinqton geri çəkilmək niyyətində deyil.
“The Atlantic”in yazdığına görə, Tramp Venesuelanın ABŞ müdaxiləsinə məruz qalan sonuncu ölkə olmaya biləcəyini də açıq şəkildə ifadə edib. ABŞ prezidenti bu kontekstdə Qrenlandiyaya da toxunaraq, “Bizə Qrenlandiya lazımdır, mütləq lazımdır”, – deyə vurğulayıb və adanın Rusiya və Çin gəmiləri ilə əhatə olunduğunu iddia edib.
“Rejim dəyişikliyi indiki vəziyyətdən yaxşıdır”
Venesuelanın gələcəyi ilə bağlı danışan Tramp əvvəlki mövqeyindən fərqli olaraq rejim dəyişikliyi və yenidənqurma ideyasına daha açıq yanaşdığını gizlətməyib. O, bəzi tərəfdarlarının narahatlıqlarını nəzərə almadığını bildirərək belə deyib: “Orada yenidənqurma və rejim dəyişikliyi – ya da bunu necə adlandırırsınızsa – indiki vəziyyətdən daha yaxşıdır. Mövcud durum daha pis ola bilməz”.
Bu açıqlamalar Tramp administrasiyasının Venesuela siyasətində daha sərt və müdaxiləçi xətt tutduğunu göstərir.
Rodrigezdən cavab: “Biz müstəmləkə olmayacağıq”
Digər tərəfdən, Delsi Rodrigez şənbə günü verdiyi açıqlamada Venesuelanın heç vaxt heç bir ölkənin və ya imperiyanın müstəmləkəsi olmayacağını bildirib. O vurğulayıb ki, Venesuela suveren dövlətdir və öz müstəqilliyini, eləcə də təbii sərvətlərini qorumaq gücünə malikdir.
Rodrigezin bu bəyanatı Trampın açıqlamalarına birbaşa cavab kimi qiymətləndirilir və tərəflər arasında gərginliyin daha da artacağını göstərir.
