Tramp administrasiyası səyahət qadağasını 30-dan çox ölkəyə genişləndirəcək
ABŞ-ın Daxili Təhlükəsizlik naziri Kristi Noem açıqlayıb ki, prezident Donald Trampın administrasiyası ölkəyə girişə dair məhdudiyyətləri əhəmiyyətli dərəcədə sərtləşdirməyə hazırlaşır. Bu çərçivədə səyahət qadağasının 30-dan çox ölkəni əhatə edəcəyi gözlənilir, lakin hələlik həmin dövlətlərin adları ictimaiyyətə açıqlanmayıb.
Nazirin sözlərinə görə, yeni məhdudiyyətlər həm migrant, həm də qeyri-miqrant kateqoriyasından olan şəxslərə — turistlər, tələbələr və iş adamlarına da şamil olunacaq. Qadağanın əsas hədəfi isə ABŞ-a səyahət edən şəxslər barədə “yetərli, etibarlı məlumat təqdim etməyən” və ya siyasi baxımdan qeyri-sabit hesab edilən ölkələr olacaq.
Dövlət Departamentindən sızan sənəd: Siyahı 36 ölkə ola bilər
ABŞ mediasının əvvəlki məlumatlarına görə, Dövlət Departamentində hazırlanan daxili bir sənəddə administrasiyanın 36 ölkəni əlavə olaraq səyahət qadağası siyahısına daxil etməyi nəzərdən keçirdiyi qeyd olunub. Bu, Trampın miqrasiya siyasətində kəskin sərtləşmə strategiyasının davamı kimi qiymətləndirilir.
Trampın sərtləşdirilmiş miqrasiya vədləri
Prezident Tramp noyabrın sonunda ABŞ-da Milli Qvardiya hərbçilərinə edilən hücumdan sonra miqrasiya siyasətini daha da sərtləşdirəcəyini açıqlamışdı. O, “üçüncü dünya ölkələrindən daimi miqrasiyanı dayandırmağa” söz vermiş və təhlükəsizlik risklərini əsas gətirmişdi.
Yeni qadağa paketi həm ABŞ daxilində, həm də beynəlxalq aləmdə müzakirələrə səbəb olub. Tənqidçilər bu qərarların humanitar və iqtisadi nəticələr doğuracağını bildirir, tərəfdarlar isə milli təhlükəsizlik üçün zəruri addım olduğunu vurğulayırlar.
