ABŞ Prezidenti Donald Tramp regional sabitliyi heçə sayan təkəbbürlü mövqeyini bir daha nümayiş etdirdi. Tramp, İraqda Nuri əl-Malikinin yenidən baş nazir olması halında Vaşinqtonun Bağdada göstərdiyi yardımları dayandırmaqla hədələdi və bu addımı ilə bir ölkənin daxili siyasi seçimlərinə açıq təzyiq göstərərək xarici müdaxiləyə zəmin yaratdı. Tramp sosial media üzərindən verdiyi açıqlamada Malikini “dəli siyasət və ideologiya”da ittiham edərək, ABŞ dəstəyini siyasi bazarlıq aləti kimi istifadə edəcəyini bildirdi.
Trampın bu təkəbbürlü mövqeyi bununla da bitmədi. Karib hövzəsində yerləşən Kuba adasını hədəf alan açıqlamasında, Venesueladan neft və maliyyə dəstəyi ala bilmədiyi üçün ölkənin “çox yaxın zamanda iflas edəcəyini” iddia etdi. Bu bəyanat Trampın iqtisadi cəzalandırma və təzyiq mexanizmləri ilə başqa bir ölkəyə sistemli şəkildə zərər vurmaq niyyətini əks etdirir.
Tramp həmçinin ticarət siyasətini aqressiv ideologiya ilə müdafiə edib. ABŞ-nin gömrük rüsumlarından 600 milyard dollar gəlir əldə etdiyini iddia edərək, bu rüsumları “uğur” kimi təqdim edib. Trampın yüksək tarifələr vasitəsilə xarici ticarətdən böyük gəlir əldə etmə cəhdi, bir çox ölkənin iqtisadiyyatını hədəfə alaraq ABŞ Xəzinəsinə resurs ötürməyə yönəlmiş talan strategiyasına bənzədiyi tənqidlərinə səbəb olub.
Bu açıqlamalar Trampın qlobal arenada güc siyasətini daha da sərtləşdirdiyini və digər dövlətlərin suveren iqtisadi və siyasi seçimlərini faktiki olaraq təzyiq altında saxlamağı davam etdirdiyini göstərir.
