Tramp və Netanyahunun gərgin telefon danışığı
İsrailin “Kanal 12” televiziyasının müxbiri Barak Ravidin məlumatına görə, ABŞ-ın sabiq prezidenti Donald Tramp və İsrailin baş naziri Benyamin Netanyahu arasında Qəzza ilə bağlı son vəziyyət müzakirə edilərkən gərgin telefon danışığı baş verib.
Ravidin bildirdiyinə görə, bu zəng Trampın “İsrail”ə Qəzzaya hava hücumlarını dayandırmaq çağırışını etməsindən əvvəl baş tutub. Tramp, HƏMAS-ın onun təklifinə verdiyi cavabı “müsbət və ümidverici addım” kimi dəyərləndirib və “gözəl, irəliləyiş var” deyib.
Lakin Netanyahu bu qiymətləndirməyə sərt reaksiya göstərərək cavab verib: “Heç bir sevincə əsas yoxdur, HƏMAS-ın cavabı əhəmiyyətsizdir.”
“Bu bir qələbədir, onu qəbul et”
Ravidin ABŞ rəsmilərinə istinadən verdiyi məlumata görə, Netanyahunun bu mənfi münasibəti Trampın qəzəbinə səbəb olub. Tramp, Netanyahuya “Niyə bu qədər axmaqsan? Bu bir qələbədir, onu qəbul et!” deyə sərt şəkildə cavab verib.
Mənbələr bildiriblər ki, sözügedən danışıq gərgin keçib və Tramp Netanyahunun neqativ münasibətindən çox narazı qalıb. Bununla belə, mübahisəli müzakirənin sonunda tərəflərin müəyyən razılığa gəldiyi qeyd olunur.
Tramp: “İsrail dərhal hücumları dayandırmalıdır”
Xatırladaq ki, Tramp cümə axşamı gecəsi Qəzza ilə bağlı bəyanatında İsrailə dərhal hücumları dayandırmaq çağırışı etmişdi. O, “İsrail Qəzzanı dərhal bombalamağı dayandırmalı, girovların təhlükəsiz çıxarılmasına şərait yaratmalıdır” demişdi.
HƏMAS-ın həmin bəyanata cavabında təşkilatın “davamlı sülhə hazır olduğu” vurğulanmış, Tramp isə “Truth Social” platformasında bu açıqlamanı “sülhə açıq və ümidverici mesaj” kimi qiymətləndirmişdi.
Trampın bu münasibəti Vaşinqton və Təl-Əviv arasında Qəzza siyasəti ilə bağlı fikir ayrılıqlarının yenidən gücləndiyini göstərir.
