Tramp Qəzza danışıqlarının ikinci mərhələsindən danışdı
ABŞ prezidenti Donald Tramp Misirin Şarm əl-Şeyx şəhərində çıxışı zamanı Yaxın Şərqin “çox fərqli və əhəmiyyətli bir dövr” yaşadığını bildirib. O, Qəzza ilə bağlı razılaşmanın ikinci mərhələsi üzrə danışıqların artıq başladığını təsdiqləyib.
Tramp çıxışında Misir prezidenti Əbdülfəttah əs-Sisini “Qəzza idarəetmə Şurası”na – onun ifadəsi ilə “Sülh Şurası”na qoşulmağa dəvət edib. ABŞ lideri, bu təşəbbüsün bölgədə sabitlik və “yeni nizam” üçün vacib addım ola biləcəyini qeyd edib.
“Qəzza çoxlu dağıntılar içindədir”
Qəzzada həlak olmuş israilli hərbçilərin cəsədləri mövzusuna toxunan Tramp, bölgədəki vəziyyəti “çox ağır” adlandırıb. Onun sözlərinə görə, Qəzza “böyük dağıntılar və xarabalıqlar içindədir” və “seçimlərin yenilənməsi üçün təmizləmə prosesi” həyata keçirilməlidir.
İranla mümkün saziş istəyi
Tramp çıxışında İranla münasibətlərə də toxunaraq, “İranla bir saziş imzalamağı çox istədiyini” deyib. O, “Qəzza razılaşmasının İranın nüvə obyektlərinə edilən zərbələr olmasaydı baş verməyəcəyini” iddia edib.
“İnanıram ki, bu, çox gözəl bir şey olacaq. Onlar da istədiklərini söyləyirlər. Biz hazırıq — siz də hazır olduğunuz zaman” deyə Tramp əlavə edib.
Şarm əl-Şeyxdə “Yaxın Şərq Sülh Sammiti”
Donald Tramp bazar ertəsi axşamı İsrailə səfərindən sonra Misirə gəlib. O, burada keçiriləcək “Yaxın Şərqdə Sülh Sammiti”ndə iştirak edəcək. Sammitdə ərəb, islam və dünya ölkələrindən bir çox liderin iştirak edəcəyi gözlənilir.
Müşahidəçilər Trampın Şarm əl-Şeyxdəki çıxışını, Yaxın Şərqdə ABŞ-ın diplomatik fəallığının yenidən artmasının göstəricisi kimi qiymətləndirirlər. ABŞ administrasiyası, xüsusilə Qəzza və İran məsələlərində yeni diplomatik cəhdlərə başlayır.
