Tramp administrasiyası 8 miqrasiya hakimini işdən çıxardı
ABŞ prezidenti Donald Trampın administrasiyası bazar ertəsi Nyu-Yorkdakı 26 Federal Plaza binasında fəaliyyət göstərən 8 miqrasiya hakimini vəzifədən azad edib. Bu barədə Miqrasiya Hakimləri Milli Assosiasiyasının rəsmisi “ABC News”a məlumat verib.
Məlumata görə, işdən çıxarılan hakimlər arasında əvvəlki illərdə yüksək nəticələri ilə seçilən hüquqşünaslar da olub və qərar ABŞ-ın miqrasiya sistemində yeni mübahisələr doğurub.
Hakim Taniya Nəmrdən Tramp administrasiyasına qarşı iddia
İşdən çıxarılanlar arasında hakimin Taniya Nəmr də var. O, ABŞ Ədliyyə Nazirliyinə qarşı məhkəmə iddiası qaldıraraq, özünün cinsiyyətinə, Livanla ikili vətəndaşlığına və Demokrat kimi keçmiş namizədliyinə görə ayrı-seçkilik edilərək işdən azad olunduğunu bildirib.
Məhkəmə sənədlərinə görə, Nəmr sınaq müddətinin ortasında və ən yüksək dəyərləndirmə aldıqdan dərhal sonra qəfil işdən çıxarılıb. Onun sözlərinə görə, bu addım “arzu olunmayan dövlət qulluqçularını hədəfə almaq” cəhdinin bir hissəsi olub.
Miqrasiya Hakimləri Assosiasiyası bildirib ki, Nəmr kimi daha 100-dən çox hakim ya vəzifədən uzaqlaşdırılıb, ya da istefaya məcbur edilib.
Tramp administrasiyasına qarşı reaksiyalar artır
İdarənin bu addımı ABŞ-da geniş tənqidlərə səbəb olub. Miqrant müdafiəçiləri təcrübəli miqrasiya hakimlərinin işdən çıxarılmasının ölkədə artıq 3,7 milyon ədəd olan immiqrasiya işləri yükünü daha da ağırlaşdıracağını bildiriblər.
Bu arada ABŞ Daxili Təhlükəsizlik Nazirliyi yeni deportasiya hakimlərinin işə götürülməsi prosesini başladıb. Nazirlik rəsmisi Trişia Maklauqlin yeni vakansiyaların məsafədən çalışma imkanı verdiyini və illik 159,951–207,500 dollar arasında əməkhaqqı təklif etdiyini qeyd edib.
“Hüquq pozuntusu” iddiası: Nəmr yenidən vəzifəsinə qayıtmaq istəyir
Nəmrin hüquqi komandası bildirib ki, onu işdən qovarkən məhkəmə zalından müşayiət edərək çıxarıblar və heç bir əsas göstərilməyib. Hüquqşünaslar Ədliyyə Nazirliyinin federal işçiləri səbəb göstərmədən vəzifədən azad etmək səlahiyyətini “federal qanunların və mülki hüquqların açıq şəkildə pozulması” kimi qiymətləndiriblər.
Hakim Taniya Nəmr Vaşinqtonda yerləşən federal məhkəməyə müraciət edərək öz hüquqlarının pozulduğunun tanınmasını, vəzifəsinə qaytarılmasını və işdən çıxarılma nəticəsində dəymiş zərərin ödənilməsini tələb edir.
