Tel-Əviv üzərində parçalanan raket
Sionist rejim mediasının məlumatına görə, İran tərəfindən buraxılan bir raket Təl-Əviv səmasında parçalanaraq bir neçə döyüş başlığına ayrılıb. Bildirilir ki, raketin başlığında 16-dan çox parçalanan bombanın olduğu ehtimal edilir.
Məlumata görə, raket parçalandıqdan sonra qəlpələr şəhərin müxtəlif hissələrinə düşüb və ümumilikdə 16 fərqli nöqtəyə zərər dəyib.
Hadisə nəticəsində ən azı 6 nəfərin yaralandığı bildirilib. Yaralılar tibbi müəssisələrə çatdırılıb və onlara tibbi yardım göstərilir.
Şəhərdə güclü partlayış səsləri eşidilib
Məlumatlara görə, raket hücumu zamanı Təl-Əvivdə güclü partlayış səsləri eşidilib. Hücum zamanı hava hücumu siqnalları səsləndirilib və sakinlər sığınacaqlara yönəldilib.
Eyni vaxtda Qüds şəhərində və Livan sərhədi yaxınlığındakı şimal bölgələrində də siren səslərinin eşidildiyi bildirilib.
Bundan əlavə, “Dovev” və “Bəram” kimi yaşayış məntəqələrində pilotsuz uçuş aparatlarının mümkün sızması ehtimalına görə təhlükəsizlik tədbirləri gücləndirilib.
İki mərhələli raket hücumu həyata keçirildiyi bildirilir
İran dövlət televiziyasının məlumatına görə, son hücum dalğasında ağır döyüş başlıqlarına malik “Xeybər” tipli raketlərdən istifadə olunub.
Məlumata əsasən, İran silahlı qüvvələri əvvəlki hücumdan cəmi bir neçə dəqiqə sonra ikinci raket dalğasını da buraxıb.
Bu hücumların İranın həyata keçirdiyi “Sadiq Vəd 4” adlı əməliyyatın növbəti mərhələləri ilə əlaqəli olduğu bildirilir.
Hücumların genişlənə biləcəyi iddia olunur
İranın “Fars” xəbər agentliyinə istinadən yayılan məlumatlara görə, İnqilab Keşikçiləri yaxın günlərdə pilotsuz uçuş aparatları və strateji raketlərlə həyata keçirilən əməliyyatların miqyasını artırmağı planlaşdırır.
Mənbələr bildirir ki, pilotsuz uçuş aparatları ilə hücumların təxminən 20 faiz, strateji raket əməliyyatlarının isə 100 faiz artırılması nəzərdə tutulur.
