Səudiyyədən rəsmi açıqlama
Səudiyyə Ərəbistanının Nəqliyyat Baş İdarəsinin məsul nümayəndəsi ölkəyə məxsus “ENCELIA” adlı neft tankerinin Qırmızı dənizdə hücuma məruz qaldığını açıqlayıb.
Səudiyyənin rəsmi SPA agentliyinin yaydığı məlumata görə, hücum nəticəsində gəminin ön hissəsində yanğın baş verib.
Heyətin təhlükəsiz olduğu bildirilib
Rəsmi açıqlamada qeyd olunub ki, tanker heyətinin bütün üzvləri xəsarət almadan xilas olub.
Bildirilib ki, aidiyyəti qurumlar gəminin və ekipajın təhlükəsizliyinin təmin olunması üçün zəruri tədbirlər görüblər.
Yəmən daha əvvəl iki tankerin vurulduğunu açıqlamışdı
Bu açıqlama Yəmən Silahlı Qüvvələrinin sözçüsü briqada generalı Yəhya Sərinin bir neçə saat əvvəl verdiyi bəyanatdan sonra səsləndirilib.
Yəhya Səri bildirmişdi ki, Yəmən qüvvələri Səudiyyə Ərəbistanına məxsus “ENCELIA” və “LAYLA” adlı iki neft tankerini raketlər və pilotsuz uçuş aparatları ilə hədəfə alıb.
Onun sözlərinə görə, əməliyyat Yəmənin elan etdiyi dəniz blokadasının pozulduğu səbəbi ilə həyata keçirilib.
Daha 10-a yaxın gəminin geri döndüyü bildirilir.
Yəmən Silahlı Qüvvələri eyni zamanda təxminən 10 gəminin marşrutunu dəyişərək geri qayıtmağa məcbur olduğunu da açıqlayıb.
Sənadakı hökumət bu əməliyyatların “blokadaya blokada” strategiyasının tərkib hissəsi olduğunu və Qırmızı dənizdə Səudiyyə Ərəbistanı ilə əlaqəli gəmiçiliyə qarşı tədbirlərin davam etdiriləcəyini bəyan edib.
Hadisə Yəmənin Səudiyyə Ərəbistanına qarşı tətbiq etdiyini elan etdiyi dəniz blokadasının qüvvəyə minməsindən sonra baş verib.
