Suriyada Ələvilərdən kütləvi dinc etiraz çağırışı
Suriyada və mühacirətdə fəaliyyət göstərən Ali Ələvi İslam Şurasının sədri Şeyx Qəzzal Qəzzal yaydığı bəyanatda bazar günü genişmiqyaslı, dinc kütləvi etiraz aksiyasının keçiriləcəyini elan edib. O bildirib ki, aksiyanın əsas məqsədi Suriyada siyasi federalizm modelinin tətbiqi ilə bağlı tələbləri ictimai və beynəlxalq gündəmə daşımaqdır.
Şeyx Qəzzalın sözlərinə görə, aksiya bazar günü saat 12:00-dan 17:00-dək davam edəcək və bu müddət ərzində ölkənin müxtəlif bölgələrində meydanlar dinc şəkildə insanlarla dolacaq. O, yalnız Ələvi icmasının üzvlərini deyil, Suriyanın digər etnik, dini və ictimai-siyasi təbəqələrini də bu çağırışa qoşulmağa səsləyib. Qəzzal qeyd edib ki, bu mərhələdə həmrəylik və birgə mövqe olduqca vacibdir.
“Vətəndaş müharibəsi yox, siyasi həll yolu”
Şeyx Qəzzal bəyanatında xüsusi vurğulayıb ki, irəli sürülən tələblər Suriyanı yeni vətəndaş müharibəsinə sürükləmək niyyəti daşımır. Onun sözlərinə görə, məqsəd ölkədə silahlı qarşıdurmanı dərinləşdirmək deyil, siyasi federalizm əsasında daha ədalətli və balanslı idarəetmə modelinə keçidi təmin etməkdir.
O bildirib ki, hazırda Suriyada yaşananlar tərəflər arasında klassik siyasi mübarizə kimi qiymətləndirilə bilməz. Şeyx Qəzzal baş verənləri kimliyə görə həyata keçirilən zorakılıq kimi xarakterizə edərək, bunun insanların iradəsini qırmaq və cəmiyyəti zor yolu ilə itaətə məcbur etmək məqsədi güddüyünü deyib.
Beynəlxalq səssizliyə sərt reaksiya
Ali Ələvi İslam Şurasının sədri beynəlxalq ictimaiyyətin mövcud vəziyyətə laqeyd qalmasını da tənqid edib. Onun fikrincə, baş verən hadisələrə səssiz qalmaq yeni qətllərə, sosial və siyasi çöküşün sürətlənməsinə gətirib çıxarır. Şeyx Qəzzal vurğulayıb ki, köklü və təcili həll mexanizmləri tətbiq olunmadan, eyni zamanda beynəlxalq səviyyədə real qoruyucu tədbirlər görülmədən vəziyyətin davam etməsi Suriyanın daha ağır dağıntılarla üzləşməsinə səbəb olacaq.
Son hadisələr və artan gərginlik
Qeyd edək ki, Şeyx Qəzzal bundan əvvəlki açıqlamalarında ölkədə yaxın zamanda daxili qarşıdurma riskinin yüksəldiyi barədə xəbərdarlıq etmişdi. O, Ələvilərə qarşı törədilən pozuntulara görə Dəməşq rəhbərliyini məsuliyyət daşımaqda ittiham edib. Bu bəyanatlar xüsusilə Homs şəhərində İmam Əli məscidində ibadət edənlərə qarşı törədilən partlayışdan sonra səsləndirilib.
Analitiklər hesab edirlər ki, Ələvilərin irəli sürdüyü bu çağırış Suriyada mövcud siyasi və məzhəbi gərginliyin yeni mərhələyə daxil olduğunu göstərir və qarşıdakı dövrdə ölkədaxili proseslərə ciddi təsir edə bilər.
