Suriya Colan üzərində tam suverenliyini yenidən bəyan edir
Suriya Xarici İşlər Nazirliyi rəsmi açıqlama yayaraq ölkənin işğal altındakı Colan torpaqları üzərindəki tam və dəyişməz hüququnu bir daha vurğulayıb. Nazirlik bildirib ki, Dəməşqin “Suriya və region təhlükəsizliyinə təsir edə biləcək texniki mövzular üzrə danışıqlara qatılması” heç bir halda “Colan üzərindəki sarsılmaz Suriyaya məxsusluq iddiasından əl çəkmək” kimi yozula bilməz.
Açıqlamada qeyd olunub ki, Colan Suriyanın ayrılmaz tərkib hissəsidir və bu bölgədə İsrailin mövcudluğu “qanunsuz işğal” olaraq qalır. Nazirlik bu məsələdə ölkənin mövqeyinin dəyişməz olduğunu vurğulayıb.
BMT Baş Assambleyasındakı səsverməyə təşəkkür
Suriya XİN bəyanatında BMT Baş Assambleyasında “işğal altındakı Suriya Colanının azad edilməsi” çağırışını dəstəkləyən dövlətlərə dərin təşəkkürünü ifadə edib. Nazirliyin sözlərinə görə, bu dəstək beynəlxalq hüquqa sadiqliyin və “Suriya xalqının işğal altındakı torpaqlar üzərində dəyişməz hüququnun” tanınmasının bariz göstəricisidir.
Açıqlamada həmçinin vurğulanıb ki, Colan məsələsi yalnız beynəlxalq hüququn tələbləri əsasında və Suriyanın ərazi bütövlüyü prinsipi çərçivəsində həll oluna bilər.
Netanyahu: “Cənub-Qərbi Suriya silahsız zona olmalıdır”
Digər tərəfdən, sionist rejimin baş naziri Benyamin Netanyahu hökumətinin mövqeyini açıqlayaraq “Cənub-Qərbi Suriyanın, Colan sərhədinə bitişik bölgənin silahsız zona olmasında israr etdiklərini” deyib. Onun sözlərinə görə, bu tələb İsrailin Dəməşqlə istənilən mümkün anlaşmaya yanaşmasında “əsas şərt” olaraq qalır.
Netanyahu bölgədəki təhlükəsizlik mülahizələrinin İsrail üçün prioritet olduğunu irəli sürsə də, Suriya tərəfi Colanla bağlı suverenlik iddiasında heç bir güzəştə gedilməyəcəyini qəti şəkildə bəyan edir.
