Middle East Eye yazır ki, 2023-cü ilin oktyabrında “Həmas”ın İsrailə qarşı həyata keçirdiyi gözlənilməz hücumdan və ardınca başlayan Qəzza müharibəsindən sonra Əbu Ubeydənin tanınırlığı kəskin artıb.
Əbu Ubeydə ən çox çıxışları ilə tanınır: döyüş meydanından məlumat verir, “Həmas”ın hərbi uğurlarını vurğulayır və İsraili hədəfə alır. İsrail onu dəfələrlə öldürməyə çalışsa da, uğursuz olub. Bu səbəbdən onun həqiqi kimliyi heç vaxt açıqlanmayıb. Əbu Ubeydə həmişə hərbi geyimdə və üzü qırmızı kəfiyyə ilə örtülü şəkildə görünür.
O, ərəb dünyasında qəhrəman kimi qəbul edilir, mitinqlərdə adı səslənir, onun şərəfinə mahnılar oxunur. İsrail ordusu isə onu əsas hədəflərdən biri hesab edir; məlumatlara görə, evi üç dəfə bombalanıb.
Kimdir Əbu Ubeydə?
Onun erkən həyatı barədə məlumat azdır. 2005-ci ildə verdiyi müsahibədə ailəsinin 1948-ci ildə sionist dəstələri tərəfindən tarixi Fələstindən qovulduğunu və Qəzzaya köçdüyünü deyib. O zaman yaşının 20-lərin əvvəllərində olduğunu söyləyərək, 1980-ci illərin əvvəllərində doğulduğunu işarə edib.
Əsl adı və şəxsi detalları gizli saxlanılıb. Əbu Ubeydə adı isə 2000–2005-ci illərin İkinci İntifadası dövründə ilk dəfə ortaya çıxıb. Adının, İslam peyğəmbərinin səhabəsi və məşhur sərkərdə Əbu Ubeydə ibn əl-Cərrəh ilə bağlı olduğu ehtimal edilir.
Onun rolu
2004-cü ildə Qəzzanın şimalına İsrailin hücumu zamanı ilk dəfə “əl-Qəssam briqadaları”nın hərbi sözçüsü kimi çıxış edib. O vaxtdan bəri, bütün müharibə dövrlərində təşkilatın əsas hərbi sözçüsü olaraq ön plandadır.
Ən diqqətçəkən çıxışlarından biri 2006-cı ildə İsrail əsgəri Gilad Şalitin əsir götürülməsini elan etməsi olub. 2014-cü ildə isə Şaul Aron adlı digər əsgərin əsir alınmasını açıqlayıb və şəxsiyyət nömrəsini canlı yayımla göstərib.
7 oktyabr və sonrakı çıxışları
“Əl-Əqsa Tufanı əməliyyatı”ndan sonra verdiyi çıxışlarda İsrail ordusunun ciddi strateji məğlubiyyətə uğradığını deyib. O, hücumun planlaşdırılmasının 2021-ci ildən başladığını bildirib. Əsas hədəfin İsrail ordusunun “Qəzza diviziyası”nı məhv etmək olduğunu söyləyib.
Oktyabrın 28-də etdiyi çıxışda ərəb liderlərini sərt tənqid edib və onların humanitar yardımı belə Qəzzaya çatdıra bilməməsindən təəccübləndiyini vurğulayıb. Onun “Allah qorusun” ifadəsi ərəb dünyasında geniş yayılan bir şüara çevrilib.
Niyə maska taxır?
Əbu Ubeydə hər çıxışında qırmızı kəfiyyə ilə üzünü gizlədir. Bu, 1990-cı illərdə İsrail tərəfindən öldürülən ilk “Həmas” komandirlərindən Yasser ən-Nəmruti və İmad Akilin də istifadə etdiyi ənənəvi simvol olub.
Ərəb dünyasında simvol
Onun çıxışları bölgədə böyük maraq doğurur, toy mərasimləri belə dayandırılaraq dinlənilir. Uşaqlar ekran qarşısında çıxışlarını izləyir, onun şərəfinə mahnılar yazılır. “Ey Əbu Ubeydə, iradən güclüdür, sözlərin güllədir” misraları ilə mahnılar ərsəyə gəlib.
İsrail və ABŞ-ın mövqeyi
İsrail mediası onun kimliyini açmağa çalışsa da, “Həmas” bunu təkzib edib. Ynet və İsrail ordusunun sözçüsü onun Hudhayfa Samir Abdullah əl-Kahlut olduğunu iddia etsələr də, heç bir təsdiq yoxdur.
Əbu Ubeydə 2024-cü ilin aprelində ABŞ tərəfindən sanksiyaya məruz qaldı. Onun “əl-Qəssam briqadalarının informasiya müharibəsi rəhbəri” olduğu, İran vasitəsilə server və domenlər əldə etdiyi və təşkilatın rəsmi saytını idarə etdiyi iddia edilib.
