az.rasthaber.com xəbər verir ki, dünyanın aparıcı soyqırım üzrə alimləri İsrailin Qəzzaya qarşı apardığı müharibənin 1948-ci il BMT Soyqırımı Konvensiyasına görə hüquqi olaraq soyqırımı təşkil etdiyini bəyan ediblər.
Beynəlxalq Soyqırım Alimləri Assosiasiyası (IAGS) qəbul etdiyi qətnamədə İsrailin Qəzzadakı siyasət və hərəkətlərinin konvensiyanın II maddəsinə uyğun şəkildə soyqırım tərifinə tam olaraq oturduğunu açıqlayıb. Assosiasiyanın prezidenti, Qərbi Avstraliya Universitetinin beynəlxalq hüquq professoru Melani O’Brian bunu “mütəxəssislərdən gələn qəti bəyanat” adlandırıb.
Səsvermədə iştirak edən üzvlərin 86 faizi qətnaməni dəstəkləyib. Dünyada 500-dən çox alimi birləşdirən təşkilat, bundan əvvəl Ruanda və Srebrenitsa daxil olmaqla doqquz tarixi soyqırımı rəsmən tanıyıb.
Qətnamədə İsrailin həyata keçirdiyi qətllər, aclıq yaratmaq, zorakı köçürmələr və humanitar yardımı qəsdən dayandırmaq soyqırımı cinayətləri sırasına daxil edilib. İsraildən bütün soyqırımı, müharibə cinayətləri və insanlığa qarşı cinayətlərə son qoyması tələb olunub.
Məlumata görə, 2023-cü ilin oktyabrında başlayan hücumlardan bəri İsrailin Qəzzaya hücumları nəticəsində 63 mindən çox fələstinli həyatını itirib, infrastrukturun böyük hissəsi yerlə-yeksan edilib və əhalinin demək olar ki, hamısı evlərini ən azı bir dəfə tərk etmək məcburiyyətində qalıb. BMT-nin istifadə etdiyi qlobal aclıq monitorinqi isə Qəzzanın bəzi hissələrində İsrailin qəsdən yaratdığı aclığın hökm sürdüyünü bildirir.
Qəzza hökumətinin media ofisinin rəhbəri İsmayıl əs-Səvabta bildirib ki, qəbul edilən bu qətnamə beynəlxalq məhkəmələrdə təqdim olunan sübutları təsdiqləyir və dünya ictimaiyyətinə “təcili olaraq cinayəti dayandırmaq, mülki əhalini qorumaq və işğalçı liderləri məsuliyyətə cəlb etmək” üçün həm hüquqi, həm də mənəvi öhdəlik yükləyir.
Hazırda İsrailin Haaqa Beynəlxalq Ədalət Məhkəməsində (ICJ) soyqırımı işinə baxılır.
