“Maariv”: İsraillilərin çoxu Qəzza müharibəsini qələbə hesab etmir
İsrailin “Maariv” qəzeti tərəfindən aparılan son ictimai rəy sorğusu Qəzza müharibəsinin nəticələrinə dair ictimai rəyin kəskin şəkildə parçalandığını göstərib. Sorğunun nəticələrinə əsasən, israillilərin 46 faizi “İsrailin Qəzzada yalnız qismən qələbə qazandığını” düşünür.
Yalnız 13 faiz respondent bu müharibədə tam qələbə əldə olunduğunu hesab edir, 35 faiz isə ümumiyyətlə “İsrailin heç bir qələbə qazanmadığı” qənaətindədir.
“Gizli güzəştlər var” – İsrailli jurnalist
“Yediot Aharonot” qəzetinin tanınmış jurnalisti Ronen Berqman hökumətin Şarm əl-Şeyxdə imzaladığı sənədlərlə bağlı sual qaldıraraq deyib:
“İsrail nəyi imzaladı? Cəmiyyət bilməlidir ki, burada gizli güzəştlər var.”
Berqman hökumətin hərbi və siyasi nəticələri ictimaiyyətdən gizlətdiyini, bunun da Qəzza ilə bağlı yekun razılaşmanın şəffaflığına şübhə yaratdığını vurğulayıb.
“Heç bir qələbə yoxdur” – Avri Yesxarof
Digər israilli jurnalist Avri Yesxarof isə “burada nə qələbə, nə də zəfər var” deyərək, HƏMAS-ın hələ də Qəzzada hakimiyyətdə qalmasının “İsrail üçün acı bir reallıq” olduğunu bildirib.
O, bunu “ağrılı, lakin reallığı əks etdirən bir razılaşma” adlandırıb.
Qəzzanın böyük hissəsi HƏMAS-ın nəzarətində
İsrailli analitik Ben Kaspit isə Qəzzanın bu günkü vəziyyəti ilə bağlı bildirib ki, HƏMAS hələ də “sektorun yaşayış məntəqələrinin təxminən 85 faizinə nəzarət edir”.
Onun sözlərinə görə, “minlərlə HƏMAS döyüşçüsü Qəzzanın müxtəlif bölgələrində mövcuddur və İsraillə əməkdaşlıqda şübhəli bilinən şəxsləri açıq şəkildə edam edirlər”.
Cəmiyyətdə böhran dərinləşir
Sosioloqlar hesab edirlər ki, sorğunun nəticələri İsraildə siyasi və ictimai böhranın dərinləşdiyini göstərir. Qəzza müharibəsinin gedişatı və nəticələri ilə bağlı hökumətə olan etimad son aylarda xeyli zəifləyib.
Ekspertlərə görə, ictimai narazılıq həm hərbi itkilər, həm də müharibənin məqsədlərinin aydın olmaması ilə bağlıdır. Bir çox israilli üçün “tam qələbə” anlayışı artıq inandırıcılığını itirib.
