İsrail beynəlxalq sularında humanitar donanmaya hücum etdi
Bu gün, çərşənbə səhəri, İsrail ordusu Qəzzaya doğru hərəkət edən “Azadlıq Donanması”na məxsus üç gəmiyə — “Sun Birds”, “Ala ən-Nəccar” və “Ənəs əş-Şərif”ə — beynəlxalq sularında hücum edib. Gəmilər 17 ildir blokada altında olan Qəzzaya humanitar yardım aparırdı.
Qəzzaya qarşı blokadanın ləğvi məqsədilə fəaliyyət göstərən Beynəlxalq Blokadanı Qırma Komitəsi bildirib ki, hücum Qəzza sahillərindən təxminən 120 dəniz mili (220 km) məsafədə baş verib. Komitə hadisəni beynəlxalq hüququn açıq pozuntusu kimi qiymətləndirib.
Rabitə kəsilib, gəmilər ələ keçirilib
Komitənin məlumatına görə, İsrail hərbçiləri üç gəmini qanunsuz şəkildə dayandıraraq, ikisinə çıxıb və rabitə siqnallarını pozub. Nəticədə, gəmilərlə əlaqə tamamilə kəsilib. Gəmilərdəki heyət üzvləri — jurnalistlər, həkimlər və beynəlxalq fəallar — ilə əlaqə saxlamaq mümkün olmayıb.
Komitə vurğulayıb ki, İsrail ordusunun beynəlxalq sular üzərində heç bir hüquqi səlahiyyəti yoxdur və gəmilər heç bir təhlükə yaratmırdı. Onların üzərində Qəzza xəstəxanalarına çatdırılmaq üçün 110 min dollardan artıq dəyəri olan dərman, tənəffüs aparatları və ərzaq məhsulları daşınırdı.
“Zamir” gəmisi İsrail qüvvələri tərəfindən ələ keçirildi
“Azadlıq Donanması”nın bir hissəsi olan “Səbat Donanması” açıqlama yayaraq, “Zamir” gəmisinin İsrail qüvvələri tərəfindən ələ keçirildiyini təsdiqləyib. Gəmidə 93 nəfər — jurnalistlər, həkimlər və beynəlxalq hüquq müdafiəçiləri olub.
Donanma hələ hücumdan öncə gəmilərdən çəkilmiş son görüntüləri paylaşaraq bildirib ki, əməliyyatda İsrailin hərbi helikopterləri də iştirak edib.
İsrail rəsmiləri saxlanılanları deportasiya etməyə hazırlaşır
İsrail Xarici İşlər Nazirliyi hadisəni təsdiqləyərək, gəmilərin və sərnişinlərin İsrail limanına aparıldığını, onların dərhal deportasiyasına hazırlıq görüldüyünü açıqlayıb.
Beynəlxalq qınaq və insan haqları çağırışı
Beynəlxalq təşkilatlar İsrail qüvvələrinin döyülmə, təhqir və zorakılıq halları ilə müşayiət olunan əməliyyatlarını kəskin şəkildə pisləyiblər. Bir çox fəallar saxlanılarkən şifahi və fiziki zorakılığa məruz qaldıqlarını bildiriblər.
“Azadlıq Donanması” 2010-cu ildən etibarən Qəzzaya humanitar yardım aparmaq və blokadanı qırmaq məqsədilə fəaliyyət göstərir. Lakin onun demək olar ki, bütün səfərləri İsrail tərəfindən dənizdə zorla dayandırılıb.
